Aizawl: Ningani khan Mizoram University Auditorium-ah NITI Aayog State Support Mission hnuaiah Women Led Development through Entreprenuership workshop neih a ni a. Chief Minister Lalduhoma chu khuallian niin Women Entreprenuership Platform (WEP) Mizoram Chapter a hawng.
Hawnna inkhawmah chief minister chuan India hmarchhaka NITI WEP chapter bultan nana Mizoram an thlan avangin NITI Aayog thuneitute chungah lawmthu a sawi a. Mizoram economy-ah hmeichhiaten an thawhhlawk hle tih sawiin, “Theihna pawh an nei, hmasawn zelna tur remchang pawh a tam,” a ti.
Chief minister chuan Mizoram sorkar hian thalai, entreprenuer thate tan Bana Kaih Scheme an kalpui tan tih sawiin, tunah hian pilot phase-ah Progress Partner 517-te chu thawhpui turin an thlang tawh a, an zinga 140 (27%) chu hmeichhia an ni.
He scheme hi Mizo hmeichhia tam zawkten an chhawr zel pawh a beisei tih a sawi.
NITI Aayog member Dr. VK Paul pawhin thusawiin Mizorama hmeichhia mahni kea dinga sumdawnna kalpuiten chief minister-in a hawn tak, WEP chu an tangkaipui ngei ngei dawn tih sawiin, a tam thei ang berin WEP-ah hian registration ti se a duh thu a sawi a. Hmeichhiate tihhmasawn hi India ramin ram changkang a thlen theihna tura tihmakmawh a nih avangin prime minister-in a ngai pawimawh a, NITI Aayog-in nasa takin an bawhzui thu a sawi.
He hunah hian LESDE Minister Lalnghinglova Hmar, Chief Secretary Khilli Ram Meena leh Anna Roy, Principal Economic Adviser leh sorkar mi pawimawh dangte an tel.