Liverpool chu UEFA Champions League nomawi la thei turin Opta supercomputer chuan a dah sang ber.
Champions League-a round of 16-a inkhel tur an pawt tawh a. Liverpool, Barcelona, Arsenal, Inter Milan, Atletico Madrid, Bayer Leverkusen, Lille leh Aston Villa te chu an tling sa a, play-off khelh hnuah Real Madrid, PSG, Club Brugge, PSV, Feyenoord, Bayern Munich, Borussia Dortmund leh Benfica te chu an tling ve leh bawk a ni.
Opta supercomputer chuan heng team 16 zingah hian Liverpool chu champion turin a ring ber a, 17.2% a hmuhtir a, Reds chu vawi 17-na atan Europe champion ni turin a dah a ni.
Paris Saint-Germain an hneh chuan Liverpool hian semi final-ah Arsenal emaw, Real Madrid emaw an hmachhawn thei dawn a. Opta supercomputer sawi lawk ang hi a thleng dawn a nih pawhin an zinkawng chu a hautak ve hle ang.
Barcelona chu champion thei tura rin kai ber dawttu niin anni hi phek lehlamah an awm ve thung a, 15.4% hmutu Hansi Flick leh a pawlte hian Benfica an hmachhawn dawn a ni.
Arsenal chu pathumnaah an awm a, anni hian 13.6% an hmu a, knockout stage hmasa berah PSV Eindhoven an hmachhawn dawn a, an zinkawngah hian Real Madrid, Liverpool leh Atletico Madrid te an awm thei dawn a ni.
Inter Milan chu palina niin, 12.7% an hmu a. Vawi 15 lai European champion lo ni tawh leh champion lai ni bawk, Real Madrid chu pangana niin, 11.6% an hmu.
Paris Saint-Germain chu paruknaah an awm a, Luis Enrique-a pawlte hian 8.8% an hmu a, an hnuaiah hian Bayer Leverkusen (4.6%), Bayern Munich (4.2%), Atletico Madrid (3.8%), Lille (1.4%), Aston Villa (1.2%), Benfica (1.1%), PSV Eindhoven (0.8%), Borussia Dortmund (0.7%), Club Brugge (0.7%) leh Feyenoord (0.6%) te an awm a ni.
UEFA Champions League final hi May 31-ah Munich khawpuiah an khel ang.