Aizawl: MNF President Zoramthanga chuan Congress chu er tham an awm tawh lo a, tuna an elpui awmchhun chu ZPM chauh an ni leh tawh tih a sawi.
Tun chawlhkar tira Champhai leh Samthang a tlawh hnuah nimin khan Khawzawl tlawhin, an party mipui hmaa thu a sawiah MNF President Zoramthanga chuan, MNF party hian harsatna eng emaw tawk thin mah se, Pathianin a hun takah a hung chhuak leh mai zel tih sawiin, “MNF chu huaisen takin a ding reng a. Ram leh hnam tana beitu, mahni nunna hial pawh thapa thawk thin a ni a, zam ve mai tur kan ni lo,” a ti.
Zoramthanga chuan hotute sitna te, demna leh deusawhna, hmuh tlin lohna te hi underground hun lai atangin an tawk tam tawh tih sawiin, “Tling lo leh famkim lo chung pawha Pathianin a kaihhruai party nghelnghet ber chu MNF hi a ni a, kum 64 Pathianin min hruai tawh a ni,” a ti.
Tunhmaa MNF-in an ngam loh lian ber chu Mizo Union an ni tih sawiin Zoramthanga chuan, “Mahse, an ral vek tawh. A hnua kan ngam loh thin chu PC Party a ni leh a, tunah chuan an ral leh tawh. Congress pawh er tham an awm tawh lo, anni hi Central (Delhi)-a innghat an ni a, khulam an hmunpui a inphet thlu deuh vek tawh a, helama thawhchhuah leh ngaihna a awm tawh lo. Tuna kan elpui awmchhun chu ZPM chauh an ni leh tawh,” a ti.
Kum 2023 inthlanpuia MNF an tlak chhan leh ZPM an chak chhan chu, Pathianin tum a neih vang a ni tih sawiin, MNF president chuan, “ZPM chu tiau vut chunga in sa, chirhdiak chunga in sa ang lek an nihna zawng zawng kan hrechiang tur a ni,” tiin, kalphung thar tia kum khat chhung lek an sorkarah pawh thil mak leh mipui beidawnna, sorkara la thleng ngai lo leh tihngai loh thleng zawng zawngte chu chung lamin ZPM nihphung dik tak mipuite hriatchiantir a tumna hmanrua tih a sawi.