Aizawl: PHE Minister Prof Lalnilawma chuan kumtluana Aizawl khawpuiin tui hnianghnar a dawn theihna turin hma lak mek a nih thu a sawi.
Nimina PHE department leh CYMA-in, Tuikhuahtlanga CYMA Hall-ah Tlawng kama ram neihna khuaa branch YMA-te kokhawma ‘Tlawng lui humhlah leh plastic sawngbawl zir hona’ an buatsaih a hmanpuinaa Prof Lalnilawma chuan Aizawl chawmtu Tlawng tuia harsatna awm thin chu sutkian a nih theih nan leh kumtluana Aizawlin tui hnianghnara a dawn theih nan hmalak mek a nih thu a sawi.
Prof Lalnilawma chuan tui hna humhalh tur leh Tlawng a lo thianghlim theihna tura hmalakna hi sorkar leh mi mal maia tih chi a nih loh avangin mipuite an zavaia an tanrual a pawimawh thu a sawi bawk.
CYMA President Lalhmachhuana pawhin mihringin dam khawchhuah nana a mamawh em em, tui humhalhna kawngah PHE Department nen thawhhona neih a ni chu lawmawm a tih thu a sawi a. Tui hna humhalh leh tihpun chu ram tan a pawimawh thu sawiin, hemi kawngah hian YMA chuan a theihtawpin hmalakna a kalpui mek a, YMA chuan ram leh hnam tana tha tur a nih chuan huang lo/kuang lo a nei lo a, ram leh hnam tan theihtawp a chhuah zel dawn tih a sawi.
He hun hi CYMA Vice Presdident Prof Lalnuntluanga’n a kaihruai a. C.Lalhmachhuana, CEC leh Prof Malsawmliana, General Secretary, CYMA ten thu an sawi a. He hunah hian Tlawng bulhnaia branch YMA 67 aiawhte an kal a ni.