Aizawl: Mizoram Agricultural Marketing Board (MAMB)-in Mizoram puma sawhthing chingtute hnen atangin an sawhthing thar chhuah quintal 16,103.60 a leisak tawh.
Mizoram sorkar chuan February 20, 2025 atang khan an flagship programme ‘Bana Kaih’ scheme hnuaiah district hrang hranga District Agriculture Marketing Committee (DAMC) kaihhruaiin sawhthing lei leh hralh chhuah thawh khatna a kalpui tan a ni.
Hriat theih chinah Mizoram sorkarin Aizawl DAMC kaltlangin khaw pathum – Aibawk, East Phaileng leh Thingsul atangin sawhthing qtls 784.14 a leisak tawh a. Lunglei DAMC kaihhruaiin khaw paruk – Thenhlum, Phairuangkai, Hrangchalkawn, Tawipui, Haulawng leh Buarpui te hnen atangin qtl 1,784.08 a leisak tawh bawk.
Champhai DAMC kaihhruaina hnuaiah khaw pariat – Mualkawi, Khawbung, Ramhrangkawn, Vaiphai, Hnahlan, New Champhai, Tualcheng, Khuangleng leh Farkawn atangin qtls. 3,719.24 a leisak tawh a. Serchhip DAMC kaihhruaiin East Lungdar, Thenzawl, Serchhip, North Vanlaiphai, Chhinghiip hnen atangin qtl 2,682.46 a leisak tawh a ni.
Mamit DAMC kaihhruaiin khaw pathum – Kanghmun, Mamit leh West Phaileng atangin sawhthing qtl 631.87 a leisak tawh a. Kolasib DAMC kaihhruaiin Lungdai, Bukpui, Saipum leh Vairengte atangin qtl 316.44 a leisak tawh a. Khawzawl DAMC kaihhruaiin Khawhai, Chawngtlai, Sialhawk, Rabung, Puilo, Khawzawl atangin qtl 2,896.11 a leisak tawh bawk.
Saitual DAMC kaihhruaiin khaw panga – Keifang, Phullen, Saitual, Ngopa leh Hliappui atangin qtl 2,038.09; Hnahthial DAMC kaihhruaiin khaw panga – Hnahthial, Tarpho, Chhipphir, Darzo leh Cherhlun khuate atangin qtl 1,027.86 a leisak tawh a, Lawngtlai DAMC kaihhruaina hnuaia Sangau atangin qtl 186.27 a leisak tawh bawk.
Hetih lai hian Siaha district chhung atangin Mizoram sorkar hian kuthnathawktute sawhthing thar chhuah a la leisak lo nia hriat a ni.