MPCC Farmers department hotute chuan tun hnaia sawhthing lei chungchanga sawhthing chingtute dem zawnga thusawi awm chu pawi an tih thu sawiin, department fimkhur tawk lohnaah minister chu mawhphurhna la ngam turin an phut tih an sawi.
Nimina Aizawl Press Club-a thu thar thehdarhtute an kawmnaah MPCC Farmers Department Chairman Lalrinliana chuan tun hnaia ZPM party chhung inkhawma Minister Prof Lalnilawma’n Chamring leh Sailam atanga sawhthing lei chungchanga sawhthing chingtute dem zawnga thu a sawi chiam chu pawi an tih thu a sawi.
Lalrinliana chuan February 10, 2025-a chief minister hoa sales letter an inhlan kha, Tripartite Arrangement – Mz State Rural Livelihood Mission, Ropuiliani Farmers Producer Company Ltd leh Reliance Retail Ltd te inkar a nih thu a sawi a. Ropuiliani Farmers Producer Company Ltd hi MzSRLM hnuaia society/self help group an ni a, MzSRLM hi rural development department hnuaia mission a ni tih sawiin sawhthing thawn chhuah hmaa uluk taka MzSRLM-ten an enfiah lo leh minister berin a department-te mawhphurtir lova farmer harsa tete mawh a phurhtir chu Chamring leh Sailama sawhthing chingtu chhungkawte rilru a nat thu a sawi.
“Hetiang thil a lo thlen takah chuan a deparment chan MzSRLM-te fimkhur tawk lohna hi minister hian a mi mal anga mawhphurhna la ngam tur zawk a ni,” a ti.
Lalrinliana chuan Congress sorkar laia dan siam, The Mizoram Agricultural Produces (Restriction on Movement) Order 1994 chu a nihna tak hre chiang si lovin dan sakei, kut hnathawktute rahbehna ang lek leka social media-ah te sawi a hlawh chu pawi a tih thu a sawi a. He dan hi December 14, 1994-ah Mizoram Gazette-ah tihchhuah niin, he danin a tum ber chu kuthnathawktuten ram chhunga an thlai thar thenkhatte an hralhnaah middle-men-ten harsatna hrang hrang an lo inrawlh thin vanga an tawh thinte laka an mahni humhalhna a nih thu a sawi.
MPCC Framers department chairman chuan, “He danin a humhalh thlate chu iskut, sawhthing, hmarcha, chhawhchhi leh la (cotton) te an ni. He dan hian phalna bik nei lote tan chuan heng thlai thlan bik pangate hi state pawna phurh chhuah a rem ti lo a ni,” tiin, he dan hi kum 1998-a MNF sorkar khan ennawnin, The Mizoram Agriculture Products (Prohibition of Movement) (Amendment) order 1999 chuan a thlak ta a. He order-ah hi chuan a hmaa thlai thlan bik pangate bakah vety sector te, sericulture sector te leh forest sector te thlengin rin luh an lo ni ta tih a sawi.
Sorkarin sawhthing a lei danah ngaih that lohna tam tak a awm tih sawiin Lalrinliana chuan khaw hrang hranga lei tura an ruahman zingah a vaia lei loh a tam thu leh, kuthnathawktuten hah taka an thawhchhuah a nih avangin sorkar chu a thutiama dinga mipuite tihnual lo turin an ngen tih an sawi bawk.