An khawpui, Khartoum-a khawpui inzawma mihring chenna lai, Omdurman-a Sudanese sipai thlawhna tlaah mi 46 vel an thi a, mi 10-in hliam an tuar bawk tih sorkar chanchinbuin a puang.
Antonov thlawhna hi Thawhlehni thimhlima Wadi Seidna air base atanga thlawk chhuak niin reilo teah a tla zui a, sipai officer leh civil mi an thi.
A tlak chhan hi chiang taka hriat a ni lo va; mahse, sipaite chuan khawl lam fel tawk lo vanga tla nia an ngaih thu an sawi.
A hma ni chiah khan sipai nena indo mek, paramilitary Rapid Support Forces (RSF) chuan South Darfur-ah fighter jet an kah thlak thu an lo puang tawh.
RSF leh sipai inkara inbeihna hian Sudan ram zau tak tuam mekin Khartoum leh Omdurman pawh a tel a, mi sang chuang thi tawhin mi maktaduai 12 chuang baihvaiin an awm phah.
Health ministry chuan emergency team-te chu civil mi hliam buaipuiin an tul nghal tih a sawi a, naupangte pawh telin a bul hnai damdawi inah dah luh an ni hlawm tih an sawi.
Khartoum-a army commander chu thi zingah a tel niin Reuters news agency chuan sipai hotu pakhat hnen atangin a dawng bawk.
Thil thleng hmutute chuan thil puak ring tak awmin in tam tak a chhe bawk niin an sawi tih AFP news agency chuan a tar lang a. A tlakna leh a chhehvela power pekna pawh a tichhia niin a tar lang bawk.
Sudan-ah hian April, 2023 atang khan tual chhung indona a chhuak mek a, sipai leh RSF chu thuneihna inchuhin an inbei nasa hle.
Indona hian an ram pawh thenin sipaite hian hmar leh khawchhak lam an chang a, RSF hian khawthlang lama Darfur region pum deuhthaw leh chhim lam hmun thenkhat an chang thung.
Tun hnaiah sipaite hian Khartoum leh a chhehvel hmun thenkhat chu RSF kut atangin an la let bawk.