GAD changtu, Chief Minister Lalduhoma chuan sorkar hnathawk ai kal la an awm hriat a nih loh thu leh a late chungah action an la dawn tih sawiin, eng vang pawha hnathawk chhunzawm thei lote chungah hriatthiamna a awm loh thu a sawi.
Mizoram Assembly budget session neih mekah nimin khan member R. Rohmingliana, MNF MLA zawhna leh member dangte zawh belhna chhangin GAD changtu, chief minister chuan sorkar hnathawk ai kal lak chungchangah a late tan grace period an siam a, hemi hun chhung hian ai kal late chu an insiam rem tur a ni tih sawiin, “Grace period a pelh tawh hnuah man chhuah an nih chuan action kan la dawn a ni,” tiin, ai kal la an la awm a nih chuan information pe turin house member-te leh mi zawng zawngin sorkarah information pe turin a ngen.
Lalduhoma chuan sorkar hnathawk ai kal la an lo la awm a nih chuan anmahni leh a thawhnaa officer lo chhawrtu, an pahniha chungah a tul angin action an la ve ve tawh dawn tih a sawi a, “Hei chen hun kan hawng tawh a, chu pawh zah lova lo la tilui an awm a nih chuan hremna an tawh ang angah an phunnawi thei lo vang,” a ti.
Sorkar hnathawk natna khirh tak tak neiten ai kal la an nih chuan hriatthiam theih an ni em tih zawh belhna chhangin Lalduhoma chuan, “A awm lo a ni. Sorkar hian hemi hrulah department zawng zawngah service review committee din vek tur kan ti a. Service committee chuan an department theuha hnathawkte, eng vang pawha hnathawk chhunzawm lote tan special voluntary scheme a buatsaihsak a. Chumi hnuaiah thawk thei lo chu an chawl mai tura ngaih a ni,” a ti.
House leader ni bawk, Lalduhoma chuan sorkar hnathawk quality siam that loh chuan sorkar a chak thei lo tih sawiin, “Sorkar pawhin a hnathawk mi mal tinah investment a rawn ti a. Chu investment a tihna chuan production a nei lo a nih chuan a thawk zel thei lo tihna a ni a. Amaherawhchu, apawng apuia inbân kan tum lo va, hnemhnang tak leh rilru nuam tak chunga an chawlh theih dan kawng hawnsak a ni a. Chumi kawng chu an zawh mai turah kan ngai a ni,” tiin house a hrilh.