Philadelphia 76ers chuan Zirtawpniah khan an thiampuipa, Joel Embiid chu tun season chhung a inkhelh theih tawh rih loh tur thu an puang.
Embiid hian hun eng emaw chen chu a khup a sawisel tawh a, Brooklyn Nets nen an inkhelh tumin a khup na hi a vung nasa hle a. An enkawl mek tho a, hma a sawn thei lo hle a, 76ers leh Embiid te hian doctor leh specialist eng emaw zat an rawn kual a, a thatpui theih dan tur an ngaihtuah ngun hle.
Season kal mekah Embiid chu khup na chungin a inkhel lui ngar ngar a, hma a sawn chhoh ve zel pawh a beisei reng a. A na chhawk tur hian a inchiu thin niin an sawi a, a na leh a vung tireh tura a inchiu hian 76ers tan a inkhel thei ve mai zel a ni.
A inkhelh hnem deuh hnuah hma a sawn lo hle a, a khup chu a na zual zel zawk a. Hetianga a nat zual tak zelah chuan a inkhelah pawh a lang chhuak a, a khel tha lo tial tial a ni.
Season hman zawh takah khan Embiid chuan a khup hliam vangin vawi 39 chauh a khel a. February thlaah an zai a, April thla tir lamah a inkhel ve leh a, 76ers chu playoff a khelhpui bakah US Olympic team chu gold medal a lakpui zui bawk.
Champion inbeisei viau mah se 76ers chu a zawnin vawi kua an chak lo a, an game hnuhnung 12-ah vawi 11 zet an tlawm tawh bawk a ni.
A zawna season sarih chhung All-Star ni thei, kum 30 mi, Embiid hian sulhnu a nei tha thei rih lo hle a, 2017-18 hnua average a neih hniam ber tum niin 2016-17 season atanga NBA a luhchilh hnua rebound a lak tlem ber tum a ni bawk.