Aizawl: Assembly Budget Session neih mekah nimin khan LESDE Minister Lalnghinglova Hmar put luh, ‘The Mizoram Youth Commission Bill, 2025’ sawiho a nih hnuah pass a ni a. Mahse, eptu MLA-ten bill pass-pui ve thei lovin house atangin an chhuak.
LESDE minister chuan bill a put luh, ‘The Mizoram Youth Commission Bill, 2025’ chu house-ah pharhin dan hmasa kha fuh tawk lo te, kim tawk lo te, tunlai thil che zel, a bikin thalaite kaihhnawih a nih avangin bilh tel ngai tam tak a awm a. Chuvangin, bill hi put luh a ngai ta tih a sawi.
Lalnghinglova Hmar chuan ZPM-in sorkarna vawnfung an chelh hnuah, MYC thuam chak dan turte, hmasawn tur zawk leh tangkai zawka hmantir hi an tum a, theihtawp an chhuah ve a. Mizoramah youth commission din tirh a nihin Sports & Youth Services department hnuaiah din a nih hnuah kum 2020 February 21 khan LESDE hnuaia dah a lo ni ta zawk tih sawiin, “Tunlai khawvelin hma a sawn zel a, a hun lai khan hnawhsaruma dante kha siam a lo ni bawk nen, hmasawnna tur tam tak a awm tih a hriat avangin, he bill thar hi put luh a ni,” a ti.
House Leader Lalduhoma chuan MYC Act hi kum 16 kalta, kum 2008 khan MNF sorkar lo siam a nih thu sawiin, “An siam laia an thinlung niawm tak tak kha a tinzawn theih a. He dan hi siam ila, a thawktu lak kawngah erawh dan leh hrai engmah behchhan awm lo se, duh duh lak leh bân theih nana engmahin min phuar loin an siam ni tur a ni a. Sum leh pai pawh duh ang anga sawp kawi theih turin audit pawh tihduh lohna thinlung atanga he dan hi lo piang a ni,” a ti.
He thu a sawi lai hian Leader of Opposition Lalchhandama Ralte a lo ding a, “He house zahawmna hi vawn hram hram a tha ka ti. He bill sawihonaa tel ve ngei, kan House Leader hi. Khatiang rilru kha tumahin an sawi loh a ni a, a kim lo chu amendment-in a kal zel tur a ni a. Khatiang kha chu house leader-in ti lo hram se,” a ti.
House leader chuan sawi chhunzawmin kum 2015 khan rei fe hman tawh hnuah Congress-in an amend tih sawiin, “A pawi lai, tha lo lai hi MNF thinlung tawmin an amend duh lo a. Vawiin thleng hian he dan hi siam that ngaiin an hnutchhiah a ni,” a ti.
Lawngtlai West Bialtu C Ngunlianchunga rawn ding ve lehin, Congress emaw, MNF emaw, siam duh lo anga a sawi chu house-ah pawh a that loh thu a sawiin, “Amaherawhchu, vawiinah pawh amend hi a sual kan ti lo, a kim lo lai dah belh hi kan pawm a. Repeal-a paih kher eng nge a tulna, dan hlui zaa 70 a chhawpchhuak leh tho,” tiin, hruaitu kal tawhte khatiang taka tih kha chu house leader tan a mawi loh thu a sawi.
House leader chuan rawn sawi lehin dan tha lo hi an repeal thin thu leh a thar an siam fo thu a sawi a. “Siam tha duh lo ho hian min sawisel a, kalphung thar kan ni a. Dan tha lo kan siam tha ang a, a pum puia paih ngai pawh kan siam zel ang. Kan ram hi kan siam tha dawn,” tia sawiin, ZPM sorkar chuan dan tha lo an tih chu an siam tha zel dawn a, kalphung hlui thilte chu a tharin thlak zel an tum thu a sawi.
LESDE minister-in a khaikhawm hnuah leader of opposition chuan house leader-in ram hruaitu hmasate diriam taka tih an nih avangin, a vei lamah thu (eptu)-ten an pass-pui ve thei lo tih speaker a hrilh a, eptu pawl member-te an chhuak a ni.