Aizawl: Mizoram Lok Sabha MP Richard Vanlalhmangaiha chuan ram tan theihtawp a chhuah mek a, an hmalaknate a hlawhtlin hmaa lo puan lawk a hreh viau tih a sawi.
Thawhtannia ZPM-in an party pisa-a chhung inkhawm an neihah thusawiin Richard Vanlalhmangaiha chuan, “Pathian leh mipui zara MP ka nih hnu hian chanchin tha avanga Zofate kan vanneihna hi a takin ka hmu nasa hle a. India lailia khawsa kan tribal-puite nunphung khu a lo la hniam hlawm khawp a, zirna chungchangah leh kawng hrang hrangah Zofate min phak lo hle a, tribal ka ni tih pawh min hre lo fo,” a ti.
Richard Vanlalhmangaiha chuan Zofaten chanchin tha hi dawng lo se, vawiina an dinhmun hi an din phak a rin loh thu sawiin, “Kan thenawm state tribal hnam mipui tam tak neite pawh statehood la nei pha ve lo an awm a, kan dinhmun hi min awt em em a ni,” tiin, amah ngei pawhin sorkar laipui duhsakna a dawng nasa tih a sawi.
Lok Sabha MP chuan Mizoram tan theihtawp a chhuak mek tih sawiin, “Kan hmalaknate hi a hlawhtlin hmaa lo puan lawk hi ka hreh viau a, a hlawhtlinna erawh kan la hmuh chhoh zel ka beisei a ni,” a ti bawk.