Mizorama oilpalm huan siamtuten an hralh tam dan azirin sorkar laipui atangin tanpuina an dawng.
India-in hriak ei chi a intodelh nan ram chhungah sorkar laipui hmalaknain NMEOOP Oilpalm scheme kalpui a ni a. He scheme-ah hian hmarchhaka oilpalm huan siamtute chu a bika duhsakna pek niin a rah an hralh tam dan azir zelin tanpuina, Viability Gap Payment (VGP) pek an ni.
Sorkar laipui chuan kum tin oilpalm year ang zela a rah hralhna rate Viability rate a siam bakah market rate ang zelin hralhna rate hi thla tin a danglam bawk a, hetianga oilpalm year khat zela a hralhna sum farmer-ten an dawn phak lohna, Viability Gap hi NMEOOP scheme atangin farmer-ten an hralh tam dan ang zelin an bank account-ah sorkar chuan a rul leh thin a ni.
Oilpalm huan siamtuten 2022-23 chhunga an hralhna atanga VGP an dawn tur chu tun lai hian sorkar laipuiin farmer-te bank account ah a pe chhuak mek a, Kolasib leh Mamit dictrict-a oilpalm farmer-ten an hralhna man an lak luh tel lovin VGP atanga an sum dawn chu a vaiin Rs nuai 200 chuang a tling a, hei bakah hian 2023-24 chhunga an hralhna atangin VGP an dawn tur pawh Rs nuai eng emaw zat a la awm bawk.