Aizawl: MNF President Zoramthanga chuan ‘Pathian leh kan ram tan’ tih thuthlung an vawn tlat avangin Mizorama party lian ber zingah a la dintir reng tih a sawi.
MNF party chuan nimin khan an party pisa, Mizo Hnam Run-ah Mizo National Day champha vawi 58-na an hmang a. He huna thusawitu MNF President Zoramthanga chuan, buaina karah vawi tam inbiakna awmin, kum 1986-ah remna sual chhuah a lo ni ta tih sawiin, “He remna thuthlung duan anih lai pawha kan tanfung lian ber chu ‘India siamna a kan tel ve loh thu’ hi la ni fanin, India chuan UT kan nih mekna state-a hlan kai leh a bika enkawlna leh venhimna pek min tiam a, thubuai awm mek zawng zawng nuai ral a ni bawk ang. Keini lamin kan ralthuam neih zawng zawng hlan a, mi dang kan puih thin te tihtawp a, MNF-in dan kan hman mek pawh dahthat kan remti a. Chu inremna in a hrinchhuah chu Constitution of India Art. 371G, enkawl bik kan nihna tur leh kan ram, kan hnam leh kan sakhua humhim tlat a nihna tur hi a lo piang ta a ni,” a ti.
State dang ten an neih ve te hi chu khawngaih thilpek a ni tih sawiin Zoramthanga chuan, “Hnam pasaltha thisen leh nunna tam tak inpekna avanga zalenna famkim la nei rih lo mah ila, vawiin kan dinhmun hi min chhuh dawn a nih chuan kan pek ve kha India hian min pek let a ngai dawn a ni,” a ti bawk.
MNF president chuan, “Pathian leh kan ram tan ral kan do a, kan bei zel a, Art. 371G kan nei ta a, Mizoram sorkar kutah kan sakhaw humhimna pawh awm ta in, kan lalpa leh a ram tan kan ram chu buatsaih turin lalpa’n min hruai lut ta a ni,” tia sawiin, hnamtin hnena a chanchin tha hril a, amah ringtua siam turin Lalpan Zoram a buatsaih a. Political Party dang 35 chuang zet an ral tawh laiin an thuthlung ‘Pathian leh kan Ram tan’ tih an vawn tlat avangin, vawiin thlengin kum 64 chhung humhim an ni a, Zorama party lian ber zingah a la din tir reng tih a sawi.
Zoramthanga chuan Mizo National Day an hman hian MNF te chu an lungphum vuan tlat a, nghet taka ding turin hrilh thar leh se, chu thuthlung nghet taka an vawn tlatna chu thuthlung neitu an Pathianin an felnaah a ruat chho zel dawn tih a sawi bawk.