Aizawl: Hnahthial District Fisheries Development Officer (DFDO) George Lalnuntluanga leh a thawhpuite bakah Chanmari Branch YMA Luidung Humhalh Committee duty-te chuan dan lova sangha man, a rep kg 13-a rit leh a neitu mi pahnihte chu an man.
Heng sanghate hi Tuichang lui ami man niin, an mi mante hi Hnahthial, Electric Veng a mi PC Lalpekhlua s/o PC Vanlalliana leh Lalremruata, s/o Lalzarliana te an ni a. Dan angin an chungah action lak an ni ang.
An sangha rep man kg 13 hi tualchhung hralhna rate chuan Rs. 20,000 man vela chhut a ni.
DFDO George Lalnuntluanga chuan, “Mizoram sorkarin kan ram luidung nungchate an chereu nasat tawh em avangin nasa takin humhalh hna a thawk mek zel a. YMA-te kutke berah hmangin ngawrh takin humhalh hna hi a kalpui mek a. Mipuite chu dan phalloh hmanga kan ram luidung nungchate sawisa lo tur leh department hnen atanga license siamtir ngei turin kan inhriattir nawn leh a. License tel lo hian khawilaiah mah luia nungcha man, tihbuai leh thah hi danin a phal lo bur tih kan inhriatttir nawn leh a ni,” a ti.