Aizawl: Serchhip DC Paul L Khuma hoin Serchhip DC Meeting Hall-ah nimin khan Serchhip khawpui chei mawi dan tur ruahmanna thlirin village council member-te nen thutkhawm a ni.
Meeting-ah hian Serchhip khawpui chhunga village council zawng zawng koh an ni a. Serchhip Beautification Committee Chairman Paul L Khuma chuan Serchhip khawpui cheimawina tur ruahmanna te hi VC te leh mipui tawiawmna tel lo chuan a hlawhchham dawn tih sawiin thawhhopuiah a sawm a ni.
He thutkhawmah hian Additional DC Lalrinzuala chuan Serchhip chei mawi dan tur ruahmanna Serchhip Beautification Project nih phung a sawifiah a. Hmun thlan bik 28-ah a hmunhma pangpar leh thil dang hmanga chei mawi – landscaping te, Serchhip Bazarah Air Quality Monitoring Board hun te, Khawtetlanga Community Garden siam te, New Serchhip North leh Serchhip Bazara fountain siam te, hmun hrang hrang thlanchhuahah chhinchhiahna – signage siam te, kawngpui kam cheina tura thing phun belh te, mi a duh apiang dana thut muan theihna tur leh chei mawina tura hmun thlan chhuaha thutthleng – park bench hun te, 2D leh 3D painting dah te he project ah hian a tel a ni. Hei bakah hian Serchhip khawpui dung – main spine tluana electric ban te leh hrui hnawk lutuk te a theih anga chinfel te; Serchhip Bazar a inpho thin – hawker te thutna leh a chhehvel te pawh mumal leh felfai zawk a chhinchhiah a, hawker zone siam tum a ni bawk.
Meeting-ah hian Beautification Plan hi uluk taka sawiho a ni a. VC member-te hian Serchhip khawpui chei mawina tura theihtawp chhuahpui an inhuam thu an sawi a ni.
SDC Dr Marilyn Lalruatkimi bakah Serchhip khawpui huam chhunga VC 14 te vawiin meeting-ah hian an tel a ni.