Aizawl: Supply Secretary Teresy Vanlalhruaii chuan National Food Security Act (NFSA) hnuaia ration card eng leh card pawl nei zawng zawngte tihchianna, kutzungpui nem (e-KYC) chu ngai pawimawh turin a ngen.
Nimina a pisaa thu thar thehdarhtute a kawmnaah Teresy Vanlalhruaii chuan e-KYC chu India ram pum puiah tih mek niin Mizoramah pawh state dangte ang bawkin February 13, 2025 khan tih tan niin, nimin (5.2.2025) chawhma dar 10 thleng khan mi 1,97,435-in an ti tawh a. NFSA hnuaia ration card nei mi 6, 96,692 atanga chhutin zaa 28.34 an nih thu a sawi.
Teresy Vanlalhruaii chuan card eng leh pawl-a member awm zawng zawngte chu ration card nei zawng zawng atanga chhutin zaa 28.34 chauh a la nih avangin eKYC kalpui mek hi March 31, 2025 hmaa zawh vek tura tih a nih avangin ration card eng leh pawla awmte chu a thlawna buhfai an dawn chhunzawm zel theihna turin chhungtinin ngai pawimawh turin a ngen.
Supply secretary chuan e-KYC hi phai lama awm emaw, mahni khua leh venga awm remchang lo emaw, India ram chhunga awm tawh phawt chuan an awmna hmuna retailer-te hnenah an aadhaar card no leh ration card no an hriat chian phawt chuan a tih theih vek tih sawiin, “Retailer-te hian tumah an hnar thei lo,” a ti.
A nawlpuiin an tih zawh hunah, natna khirh leh harsatna nei, retailer-te pan thei lo tan pawh kutzungpui nem (e-KYC) ti turin ruahmanna siam tum a nih thu leh naupang biometric la la thei lote tan an chungchang ngaihtuah mek a nih thu a sawi a. India ram pawna awm mekte erawh ram chhunga an lo let leh hunah tithei tura sorkar laipuiin ruahmanna a siam dawn niin a sawi a. Hetih lai hian ration card var leh card sen neite tan erawh e-KYC tih a ngaih ve loh thu a sawi bawk.
The Zozam Times zawhna chhangin Teresy Vanlalhruaii chuan hun tiam chhung (March 31,2025 thleng)-a e-KYC ti ve lote chu ration card atanga an hming paih an nih leh nih loh tur chu an la hriat chian loh thu a sawiin, “Heti hian kalpui a ni phawt ang a. Engtik atangin nge sorkar laipui ministry lamin an rawn chin fel dawn kan la hre lo a. Kan hriat theih chin zawng chu, quota tur buhfai allocation an rawn siam dawn a. e-KYC tilote tan lo hum theih an awm dawn lo a ni,” a ti.