Aizawl: MPCC Treasurer Dr Lalmalsawma Nghaka chuan sorkar chu a intiam anga a din loh avangin Zoram dung leh vanga kuthnathawkte zingah beidawnna a thleng mek niin a sawi.
Nilaini khan MPCC Treasurer hian Saiphai, Saipum, Phainuam leh Vairengte khua-a hmunphiah chingtute dinhmun a enfiah a. Sorkarin hmunphiah lei tura a intiamna chu dawtah a chan mek avangin, hmunphiaha eizawngte chawbel ben buak sakin an awm tih sawiin, “Kum tluana an tha sen pawh engmah lovah a chang chho mek a, an hma lam hun beidawng takin an thlir mek a ni,” a ti.
Dr Lalmalsawma Nghaka chuan, khua a tlawhna hmuna hmunphiah chingtute chu Congress sorkar laia bul tan an ni tlangpui tih sawiin, “Kum khata cheng nuaih 2 chuang hmu thin te khan, ZPM sorkar hnuah cheng sing 4-5 pawh an la lut pha tawh lo nawk a ni,” tiin, sorkar chu intiam anga a din loh avangin Zoram dung leh vanga kuthnathawkte zingah beidawnna a thleng mek a. Hmuhphiah bikah ngat phei chuan, nikum lamah lungngaiin an kun ngawih ngawih tawh a, kuminah pawh an manganna chu beidawnna runpuiah a chang chho mek niin a sawi.
ZPM sorkar hian kuthnathawk, miharsa leh rahbi nghet lote harsatna a hmunah en ngai lo vin, an dinhmun dik tak a hmu thiam pha lo va, mi nawlpui harsatna hi an hrethiam pha lo tih a chiang hle tih sawiin MPCC Treasurer chuan, Mizoramah hian sorkar lo awm tawh leh awm mekte zingah mahni thuthiama ding nghet a, mahni flagship hlawhtlinpui awm chhun chu Congress sorkar a ni tih mipuiin an hre chiang tulh tulh niin a sawi bawk.