Aizawl: MNF party Office Bearers chu nimin khan VC/LC inthlan neih zawh tak thlirletna leh party hmalak zel dan tur hrang hrangte relin Mizo Hnam Runah an thukhawm a. Assembly Session neuh meka chief minister khawsak dan chu ram hotupa ber tih atan mawi lo tam tak a awm thin chu pawi an tih thu an sawi.
Thutkhawm kaihruaitu MNF President Zoramthanga chuan MNF kal zelna turah Pathian dah pawimawh bera ram tana theihtawp an chhuah chhunzawm zel tul a tih thu leh sorkar kal mek dan mumal loin ram mipui a tichiai mek a, sum harsatna leh rorel thiam lohna innangin harsatna mipuiten an hmachhawn zel dawn tih sawiin ram kaihruai tura MNF party chu rinawm taka an inbuatsaih chhoh zel tul tih a sawi.
He meeting-a kalkhawmte chuan assembly budget session neih meka MNF MLA-te chet dan chu chhuanawm an tih thu te, session neih meka chief minister, house leader ni bawk khawsak dan chu ram hotupa ber tiha tan mawi lo tam tak a awm thin hi pawi an tih thu leh house-a chhang let tur awm ve lo, hruaitu hmasate sawisel thanhnana mite thatna reng reng hmu thei lo leh hmu thiam lo CM kan nei hi a pawi an tih thu te, zu khap burna dan kan neih mek chu siam danglam a, zu thlah zalenna hmahruai atan wine leh beer thlah zalen tur leh sorkarin Excise & Narcotics Dept kaltlanga ualau taka mi thenkhatte lei theih tura zu dawr a siam tur hi tha an tih loh thu te, VC leh LC inthlan neih zawh taka MNF-in seat thahnem tak an la thei chu lawmawm an tih thu te, ZPM sorkarin mipui beisei an pha lo chu pawi an tih thu leh loneitute hnena an intiamna erawh hi chu tihlawhtling ngei ngei turin an phut thu te leh Lengpui Airport IAF kuta hlan an rem tih loh thute resolution an siam a ni.