Aizawl: Mizo Zirlai Pawl (MZP) General Headquarters, Aizawl buatsaihin nimin khan ‘Zoram Ni’ hman a ni.
Kum 1966 March 5-a Mizoram bomb hmanga beih champhaphak, ‘Zoram Ni’ hi Dawrpui Multipurpose-ah hman a ni a, he hun hi K. Vanlalvena, MP (Rajya Sabha) chuan khuallian niin a hmanpui.
Khuallian K. Vanlalvena MP chuan India Independence Movement-ah Mizote an tel loh avangin India danpui-ah Mizote himna tur a awm loh avangin, Mizo Independence Movement a lo piang tih sawiin, “Mizoten kum 1966-a zalenna a puan hi jet fighter meuh hmanga hmeh mih tum a ni hian he movement nep lohzia a tilang a ni,” a ti.
Mizo Independence Movement hi hlawhtling chiah lo mah se Mizote himna tur hi chiang takin India danpuiah tar lan a ni ta tih sawiin K Vanlalvena chuan, “Kan ram leh kan sakhua humhim hi kan mawhphurhna a ni. Tun hnaiah kan unau – Manipur, Burma leh Bangladesh atanga rawn raltlante ngaih theih lohna leh hmuhsitna sawi a tam hle a. Hetiang mite hi a tlangpuiin vai nationalism-in a chhum hminte an ni tlangpui a. Tunah keini him angin lang mah ila, engtik niah emaw chuan kan unau, tuna kan mikhualte hi kan la belh hun a la thleng lo ang tih a sawi theih loh. Chuvangin, chapo thei kan ni lo,” a ti bawk.
MZP President H. Lalthianghlima pawhin thu sawiin kum 1966 khan Mizoten zalenna famkim nei turin hma an la a, India an nih loh hlauin jet fighter meuh hmangin an bei a. Mizoram a intodelh hmaa min enkawl hi central India mawhphurhna a nih thu a sawi.
Kumin Zoram Ni thupui atan ‘Tho la, ding ta che’ tih hman a ni. Thupui hmangin Vanneihtluanga Editor, Lengzem chuan thu a sawi bawk.
He hunah hian MZP member-te bakah college zirlaite leh NGO hrang hrang aiawhte an tel a. Zoram Ni puala article inziah siak leh Reels insiamsiak a lawmman sem nghal a ni.