Bannu, Pakistan-a sipai hmunah thihchilhtu mi pahnihin Thawhlehni chawhnua an bomb pai an tihpuahah mi pakua vel an thi a, mi dang 25 chuangin hliam an tuar bawk.
Bomb a puah hnuah hian mi thenkhatin compound chhung hi an lut zui a; mahse, hnawh kian theih an ni.
Meikhu nasa takin a zam a, bomb a puah hnuah hian silai puak ri pawh a awm niin police officer Zahid Khan chuan a sawi.
“Bang an tihchhiat hnuah mi dang panga paruk velin cantonment-a luh an tum zui a; mahse, thah vek an ni a. Heng lai velah hian beihpui la thlak chhunzawm a ni,” tiin sipaiten thu an chhuah.
Bannu-a sipai hmun beihna hi Pakistani Taliban hel pawla inziak lut, Jaish Al-Fursan chuan an tihah an chhal nghal.
Sipaite chuan thi zat an la puang chiah lo va; mahse, Bannu District Hospital chuan mi pakua vel an nih tawh thu an sawi thung.
Beihna thlenna hmun hi Khyber Pakhtunkhwa province-a sipai tamna lai hmun a ni a, helai bawr hi hel pawl chi hrang hrang, Pakistani Taliban ang chi an tamna lai a ni bawk.
Muslim thla thianghlim, Ramadan lai niin ni lan chhung tumahin engmah an ei leh in loh lai, tlai lam tawngtai hun laia bomb hi tihpuah leh beihna hi thleng a ni.
Nikum November khan thihchilhin car hmanga venhim hna thawktute duty-na hmuna bomb tihpuahah sipai 12 an lo thi tawh.
July thla khan thihchilh thovin sipai hmun chu puak thei phur lirthei hmanga beih a nih bakah mi dangin a hungna pawn lam an lo kap chiam tawh bawk.