India chhim lam, Unesco World Heritage hmunah hmeichhe pahnih pawngsual rawn an ni a, mipa pakhat thah a ni bawk niin police-in an sawi.
Hmeichhiate hi Israeli khualzin niin mipa hi Indian homestay enkawltu a ni a, khualzin ve tho mipa pathum dang nen Hampi bul, Karnataka-a dila an leng chu Ningani zan khan mipa rualin an bei niin police Superintendent Ram Arasiddi chuan Reuters a hrilh.
Arasiddi-a hian a beitute hian mipate hi Tungabhadra River tuikawnga an hnawh kian hnuah hmeichhe pahnih hi an pawngsual niin a sawi.
Mipa pahnih, pakhat zawk American, te hi an dam chhuak a, pakhat hi Inrinni tuk khan a ruang hmun a ni.
“Mi panga, hmeichhe pahnih leh mipa pathum hi Sanapur bulah beih an ni,” tiin Arasiddi chuan a sawi.
“Mipa pahnih hi ram dang mi an ni a, American pakhat leh hmeichhiate hi Israel an ni,” a ti.
Police chuan a beitu nia puh mipa pahnih an man tawh a, chhui zui zel a nih thu Arasiddi chuan a sawi a. Police chuan a beitute hian a rukin an zui a nih an ring.
US State Department chuan Hampi bula ‘tharum thawha pawi khawihna thlengah US khua leh tui a tel ve tih an hriat thu leh an ngaihven thu’ a sawi.
Hmeichhe pakhat zawk chuan Sanapur-a temple bula an awm laiin motorcycle-a chuang mipa pathum lo kalte chuan petrol lakna tur an zawt tih a sawi.
An zinga pakhat chuan kawng a kawh hmuh a, kal thar zinga pakhat chuan khualzinte hnenah Rs. 100 a dil zui niin a sawi bawk.
“Homestay neitu khan tute nge an nih a hre lo niin a sawi a, pawisa an nei loh thu pawh a sawi,” tiin police chuan a sawi.
“Pawisa an dil luih tlat avangin khualzin mipa pahnih chuan Rs. 20 an pe a. Hemi hnuah hian mipa pathum hi buaina siam zawngin an che zui ta a ni,” tiin hmeichhe sawi dan a sawi chhawng.
Khualzin mipa pakhat zawk ruang hi Tungabhadra tuikawng, Koppal district, Karnataka-ah hmuh a ni.
Gangavathi Rural Police Station-ah mi pawisa chhuh luih, mi rawk, pawngsual rawn leh mi thah tum thubuai ziah luh a ni a. A tuartute hi sorkar damdawi inah enkawl mek an ni tih police chuan an sawi.
Hampi hi Karnataka-a hman lai khaw hlui, Vijayanagara Empire hun laia temple leh in chhia tam tak awmna niin kum 1986 khan Unesco chuan World Heritage Site-ah a puang a ni.
Karnataka Chief Minister Siddaramaiah chuan thil thleng chu pawi khawihna rapthlak tak a nih thu X-ah a tar lang a. “Thil thleng ka hriat veleh police hnenah chhui dan leh thil thleng ka ngaihven nghal a, a titute rang taka man chhuak turin ka ti a. Police hian mi pahnih an man tawh a ni,” a ti.
India-ah hian nikum khan Kolkata, West Bengal-a damdawi ina doctor zirlai pawngsual leh thah a nih khan khawvel a ngaihven phah hle a. Ram chhungah hmeichhiate himna tha lo chu nasa taka aupui a ni.