Myanmar-a sipai sorkar hotu chuan an ram inthlanpui chu December, 2025 emaw, January, 2026-ah an huaihawt dawn tih a sawi.
General Min Aung Hlaing-a hian inthlan hi ‘zalen leh dik’ a ni dawn tih a sawi a, political party 52-in an chuh tur thu an thlen tawh niin a sawi bawk.
Tun hi kum 2021-a sipai sorkarin thuneihna an chan hnua inthlan hmasak ber tur a ni a. Thuneihna an lak dawn hian mipuiin an thlan, Aung San Sung Kyi leh a thuihhruaite chu manin an tantir a, a hma kum chiaha inthlan chu a dik lo nasa niin an sawi a ni.
Sipaiten thuneihna an chan leh hnuah hian an ram an buai zui a, mipuiin duh lovin an bei let nasa hle a, silai lekin tun thlengin helna a la tam hle.
Mi thenkhat chuan tuna inthlan huaihawt tur hi sipaiten anmahni tantu political party-te hmanga insawhngheh an tumna mai niin an sawi nghal thung.
Tlawmngai pawl, Human Rights Watch chuan, “Sipaite hian tun ang dinhmunah hi chuan pangngai taka inthlan theih a ni dawn lo tih an hre chiang a. Inthlang tur chuan tharum thawhna an tihtawp a ngai a, mi an mante an chhuah a ngai a, political party zawng zawngin an chuh theih leh eptu party-te thiat lova zalena an awmtir a ngai,” a ti.
Sipaite hian thuneihna an chan hnuah anmahni duh lotute chu tharumin an hmachhawn a, mipui rorelna duhtu tam tak tihlumin chanchinbumite pawh lung in an tantir.
Hetih rual hian an ram puma mipui rorelna duhtute helna leh hnam bila helte erawh a hmet mit zo lo va, an khawpui lian pawn lam chu an thunun zo lo hle a ni.
UN chuan Assistance Association for Political Prisoners (AAPP) chhinchhiah dan chuan kum li liam ta, January thleng khan sipaite hian civil mi 6,231 vel an that tawh a, heng zingah hian hmeichhia 1,144 leh naupang 709 an thi tawh niin a tar lang.