Kan political party ten inthlan dawnah ram an kaihhruai dan tur an tlangau pui a. Chu an policy avang chuan kan vote tling thin. Chu chu democracy ropuina leh thatna lai tak pawh a ni reng a ni.
Tun a kan sawrkar term ah pawh ZPM sawrkar chuan kuthnathawktute tana tha thei ang ber tur tlangau puiin an thlai tharte chu sawrkarin man man tawkin a leisak dawn a ni an ti a. Kuthnathawktute tan chuan chu tluka duhthusam a awm thei lova, kan vote tling ta reng a ni.
Amaherawh chu kan ram hruaitute hian an tlangau hla hi an lo chiang lo thei hle mai thin a. Hun kal tawhah Congress in NLUP leh MNF in SEDP hmanga intodelh min lo tiam tawh a. Tunah hian ZPM sawrkar chuan chuan an intiamna chu hlenchhuah tumin thlai thar an lei tur zinga mi hmunphiah leh sawhthing lei chu an han kalpui tan a. Mahse, mipui beisei ang thil a thleng lo nasa hle. Hmunphiah chingtute lungawi lo thawm a ring tawh hle a. Sawhthing thartute lah chuan sawrkarah rinna an nghat zo lo nge ni, sawrkarin kg khat Rs 50 in kan lei ang an tih mek laiin a aia man tlawm zawk fe in an hralh mek hlawm bawk a. Lei vek tura insawi kan sawrkar lah chuan ni 8 March, 2025 thlengin kuthnathawktute sawhthing chu hmun sawma thena hmun khat pawh a la lei lova. Sawhthing hralh hun hi May thla a ral chuan chhunzawm chi a ni tawh lo bawk. An lei zung zung theih lohna chuanlam an siam chu a dahkhawlna hmun an neih loh vang a ni. A dik pawh a dik hmel hle. Engpawh nise, sawhthing lei hi mipui beisei ang chuan an kalpui thei lo tih a chiang.
Engvanga an beisei ang phak lo nge tih hi chhut chian a ngai a. Mipui vote duh vanga an thil intiam hi thil tihhlawhtlin theih a ni reng em tih zir chiang hmasa lova mipui min tiam hi a pawi thei khawp mai. Tunah pawh hian mipui tam tak rilru a na a. Sum leh pai an beisei ang an hmuh tak loh avangin kumpuilingleta an lo hah pui chu beidawnna in a hmuak mek a ni. Mizoram pumpui sawhthing thar lei tur hian kan sawrkar hian pawisa nei eng ang mahse sawhthing heti zozai lei tur chuan a dahkhawlna hmun a nei lo hrim hrim a. An thusawi hi tihhlawhtlin theih a ni lo a ni.
Hetianga thil tihhlawhtlin theih loh min tiam an chin avang hian sawrkar kal liam taah te beidawnna nasa tak kan ramah a lo awm tawh a. Bumna danglam deuh kan tawk leh ni mai te pawhin a lang. Kan sawrkar kal mek hian tunah hian kum li zet hun an la nei a. Tuna an hlawhchhamna leh mipui beidawnna hi zirchiangin kum leh lam atan inpuahchahna tha zawk han chhawp chhuak hram se a duhawm hle mai.