Aizawl: Chief Minister Lalduhoma chuan Indian Airforce (IAF) kuta Lengpui Airport hlan chungchanga Draft Memorandum of Agreement (MoA) chu working committee-in a buatsaih mek a, peih fel a la ni lo a, cabinet ngaihtuah turin theh luh a la nih loh thu house a hrilh.
Nimina Assembly Budget Session-a Tuirial bialtu MLA K Laldawngliana zawhna chhangin GAD changtu, chief minister chuan hemi IAF kuta airport hlan chungchang zir chiang tur hian ‘Working Committee to Look Into the Maintenance & Management of Lengpui Airport’ chu TBC Lalvenchhunga, MLA & Adviser to the chief minister (Finance & Planning) kaihhruaina hnuaiah November 18, 2024 khan din leh a ni tih sawiin, “IAF hnena hlan chungchang zir chiang leh Draft Memorandum of Agreement buatsaih turin sorkarin a din a ni,” a ti.
Chief minister chuan Draft MoA hi committee-in a buatsaih mek tih sawiin, “Peih fel a la ni lo va. Cabinet ngaihtuah turin theh luh a la ni lo,” a ti bawk.
January 17, 2025 khan working committee chuan All NGO, Lengpui nen PL Restaurant Rest Room, Lengpui-ah sawihona an neih tawh thu leh, January 27, 2025 khan All NGO, Mizoram nen Planning Department Committee Room-ah sawihona an nei leh bawk tih a sawi a. Hemi hnu hian chief minister hovin NGO Co-ordination Committee nen sawi ho leh niin 16th Finance Commission hnenah airport tihchangtlunna tur nawr ho nise an tih thu a sawi bawk.
Sorkar hmasain airport atanga chhiah lo lak, BSF passenger service fee te, parking leh pre-paid counter, advertisement leh dawr luah man bak chhiah thar lak a nei em tih zawhbelhna chu Chief Minister Lalduhoma chuan, “Airport-ah hian chhiah dang kan lak awm ka hre lo, ka hre sual a nih loh chuan, sak that mekte a ni a,” tiin a chhang.