Aizawl: Assembly Budget Session neih mekah Thawhtanni khan Excise Minister Lalnghinglova Hmar put luh, zu khapna dan siam thatna tur, ‘Mizoram Liquor (Prohibition) Amendment Bill, 2025’ sawiho a nih hnuah eptu MLA-ten pass-pui ve thei lovin house atangin chhuak mah se pass a ni.
Lalnghinglova Hmar chuan a bill put luh chu kuthnathawktute lamtang bill a nih thu sawiin, “Zu khap burna a ngheh lehzualna tur bill a ni. Kuthnathawktute an saltanna atanga zalenna dar vuaksakna tur a ni,” tiin zu phalraina bill a nih loh thu a sawi.
Tun dan hman mekah Champhai leh Hnahlan tea winery-a grape atanga wine siam chhuah chiah phal a nih thu sawiin excise minister chuan, “Grape chingtute kan duhsak rualin Mizoram tharchhuah balhhla, lakhuihthei, kawlthei, sunhlu leh kiwi chingtute kan hmangaih a, kan duhsak a. An product atangin wine siam ve se kan duh,” tiin, dan tharah chuan beer pawh Mizoram atanga thlai thar chhuah atanga siam phal a ni dawn tih a sawi.
Excise minister chuan a bill put luh tur chu a leak out tih sawiin, “Kohhran hruaitute pawhin an lo hmu a. Inlengte pawh kan nei. He bill leak out-ah hian zupui leh zu tuitling siam phalna awm chu kohhran hruaituten telh lo turin min ngen a. March 1, 2025-a ZPM Legislature Party inhmukhawm chuan a ngaihtuah a, telh a ni ta lo a ni,” tiin, hemi rual hian zufang siam phalna pawh paih law law rel a nih thu a sawi bawk.
Lalnghinglova Hmar chuan dan thar a putah chuan tun hmaa a huam ngai loh autonomous district council pawh a huam tawh dawn tih a sawi a. Dan hmasa aiin an kauh zawn dawn tih a sawi bawk.
‘Mizoram Liquor (Prohibition) Amendment Bill, 2025’ hi House Leader Lalduhoma leh Leader of Opposition Lalchhandama Ralte bakah member eng emaw zatin an sawiho a. Excise minister-in a khaikhawm zawh hnuah, speaker-in a buk dawn chiah tihin leader of opposition ding chhuakin zu zawrhna tur bilh lut chunga pass-pui theia an inngaih loh thu leh zu khap bur duh chunga zu zawrhna tur pass tel ai chuan an pass-pui theih loh thu speaker a hrilh a. Hemi hnuah BJP MLA Dr K Beichhua rawn ding velehin excise department-in special permit neiho chungah zu an zawrh dawn avangin an pawmpui theih loh thu sawi velehin, eptu pawl member-te an chhuak a ni.
Eptu pawl member-te an chhuah hnu hian bill hi pass a ni ta tho a ni.