Aizawl: Assembly Speaker hlui, Lalrinliana Sailo chuan Mizoram budget pharh taka sorkarin leiba neisaa a a luhpui vanduaithlak a tih thu a sawi.
Nimina BJP State office, Mipui Run-a party chhung inkhawmah thu sawiin BJP State Core Group Member ni bawk, K Lalrinliana chuan, tun sorkar kal mekah Mizoram Youth Commission repeal bill hmuh tur a awm chu zia lo a tih thu sawiin, “MYC hming hi an la hmang duh a nih chuan Amendment Form a ni tur a ni. Repeal ni si a, MYC hming an la hmang tho hi a zia lo hle. Repeal a nih chuan MYC hi thai bo a ni tur a ni a. MYC hming an la hmang reng a nih chuan repeal a ni thei lo,” tiin, opposition MLA-ten house an chhuahsan kha an tih awm reng a nih thu a sawi.
Lalrinliana Sailo chuan Mizoram budget pharh taka Mizoram sorkarin leiba neisaa a luhpui chu vanduaithlak a tih thu sawiin, “Sorkar leh BJP hi kan kal dun thiam a, Zoram mipuite avangin heng kan harsatna te hi kan sutkian tlan hi a pawimawh ka ti hle a ni,” a ti.