Aizawl: Women & Child Development in nimin khan International Women’s Day an lawm a, Khawlrinpuii hnenah Zakapa Award hlan a ni.
Dawrpui Multipurpose Centre-a hun hmanah Social Welfare Minister Lalrinpuii chuan khual zahawm niin a hmanpui a. Hmeichhe MLA pahnih, Baryl Vanneihsangi leh Prova Chakma te chu khual zahawm an ni.
Khuallian chuan NITI Ayog-in Sustainable Development Goal Index a tihchhuah enin hmeichhiate dinhmun tehfung awmna SDG 4-te en chuan Mizo hmeichhiate dinhmun chawisan kawngah hmabak thui tak a la awm a. Hemi kawnga hmasawn tur hian chhung tina mipa leh hmeichhia tanrual a pawimawh thu a sawi.
Social Welfare Tribal Affairs, Women & Chield Development department Commissioner & Secretary Lalzarmawii kaihhruai inkhawmah hian Khawlrinpuii, Khatla South hnenah Zakapa Award hlan a ni.
Inkhawmah hian Mizo hmeichhia, Local Council-a term thum (2015, 2020 & 2025) lo tling zawn tawhte, infiamna lama Mizo hmeichhiate hming tithatu mi pariatte, kum 2021-2024 inkara STEM (Science, Technology, Engineering, Mathematics) Education-a titha hmeichhia College Topper mi pathum, Mizo hmeichhiate zinga a hmasa ber nihna hauhtu mi panga bakah sumdawnna lama anmahni thiamna hmanga eizawnna bul tantu mi pahnih, an vaiin hmeichhia 33 hnenah chawimawina leh lawmpuina hlan an ni bawk.