Aizawl: Union Home Minister Amit Shah chuan NGO Coordination Committee (NGOCC) hruaitute hnenah Lengpui Airport tihchangtlun hna chu Airport Authority of India (AAI)-in an thawh tur thu leh thla ruk chhungin hna an thawh tan tur thu a lo hrilh.
Zan khat riaka Mizoram tlawha zin, Union Home Minister Shah hi Inrinni tlai khan NGOCC-a tel pawl hrang hrang – Central YMA, MHIP leh MZP hruaituten Raj Bhavan-ah an kawm a. Pawl hrang hrangte hian an ngaih pawimawh thil hrang hrang an sawipui zingah airport tihchangtlunna tur sum ruahmansak tur leh tichangtlunna tura ruahmanna siam turin an ngen.
Union home minister hian airport chu tihchangtlun a duh thu leh a ngaih pawimawh thu sawiin, AAI-in buaipui tur thu a lo sawi a. Thla thum chhungin AAI hian thil tul zawng zawng an buaipui anga, thla ruk chhungin tihchangtlun hna an thawh tan tur thu a sawi bawk.
NGOCC chuan ram rohlute zinga mi, Lengpui Airport tihchangtlunna tura ruahmanna siam a ni chu lawmawm an tih thu sawiin, Union Home Minister Shah chungah lawmthu an sawi a. Airport tihchangtlunna tura theihtawp chhuaha ngaihtuahna sengtute leh mipuite tanrualna avangin lawmthu an sawi bawk.