Laldinsanga’n world title chuh a tum a, rahbi tuk sang zel tura a kalkawngah pro boxer a nih hnua a inhnek ngai lohna a pianna khuaah ram dang fighter nen an innuai dawn.
Ruihhlo avanga talbuai nasa hman, F Lalthanliana Junior chuan boxing luhchilhin a nun dan a tidanglam a, 2024 LPS Pro Fight title fight-ah a hma kuma a hneh loh, C Lalhruaitluanga hnehin a champion.
Lunglei boxer pahnih hian LPS Pro Fight champion kawnghren an kawl ve ve a, High Power Committee Lunglei chuan Leitlangpuiah thil thar thlentir an duh a, LPS Promotion nen thawk dunin April 24 leh 25-ah professional boxing pui tham tak buatsaih tumin ruahmanna an siam.
High Power Committee Lunglei Fight Night-ah hian Ramthar Lunglei tlangval, Dinsanga’n hmun pawimawh a luah dawn a, world title chuh turin world ranking-ah a sang 20 china a inhlan kai a tul.
Tunah hian khawvel pum huap boxrec bantamweight rating-ah 72 ni mekin WBC ranking bikah 38 a luah ve thung.
WBC Youth bantam champion Dinsanga hian tu nge a hnekpui dawn tihfel a la ni lo a; Filipino Boxing Council hnuaia boxer tha leh a ranking vawrh sang thei tur dawr mek a ni a. LPS Promotion chuan a lo berah professional huangah vawi 10 tal chak tawh a ni tur a ni tiin duh dan a nei.
Mizo zinga professional huanga thleng sang ber ni mek, Dinsanga hian 2022 LPS Pro Fight atangin pro boxing a luhchilh a, vawi 10 a inhnek tawhin a chak vek.
Nikum November 24 khan Bangalore-ah WBC Youth title chuhin Ghanaian Michael Decardi Nelson a hneh a, ram dang boxer pathum hneh tawhin Thai pahnih an tel a ni.
A pianna leh a chenna hmun nghet, Lungleiah pro boxer a nih hnuah a la inhnek lo a, Leitlangpui mipui hmaa a theihna lantir hlan a nghakhlel hle.
Hetiang bawk hian Pro Fight middleweight champion Thanliana’n a vawi khat nan pro boxing-a chak thei turin phurna a nei sang a, a hmaa ding turin Mizo ni lo, Indian boxer dawr mek a ni bawk.
Electric Veng, Lunglei tlangval, Thanliana hian boxing hmanga ruihhlo a hneh hnuah huam zau zawka hma lam pan tumin hmathlir a nei a, 2023 Pro Fight title fight kha pro boxing a khelh hmasak ber leh awm chhun niin Chawngtlai boxer Hruaia a lakah a chak zo lo a ni.
Lungleiah hian Mizo boxer eng emaw zat inlan turin ruahmanna siam a ni a, chung zingah chuan Mizo zinga pro boxing khel tam ber Vanlalawmpuia a tel ang. WBC India champion Awpa hi vawi 15 inhnek tawhin tum 11 a chak a, a inhnek hnuhnun vawi ngaah a chak vek a ni.