Aizawl: Central YMA hnuaia ruihhlo do tura din Central Anti Drugs Squads (CADS) chu din thar leh a ni.
October 24, 2024-a YMA Rorel Inkhawm vawi 4-na R. Dengthuama Hall-a neihah, ‘Ruihhlo Do kawngah YMA-in tun aia chak zawkin hma la rawh se’ tia a rel bawhzuiin, Central YMA hnuaia ruihhlo do tur Central Anti Drugs Squads (CADS) chu dinthar leh a niin, Inrinni khan Central YMA Hall, Tuikhuahtlang-ah CADS member tharte lawmluhna hun hman a ni.
Central YMA General Secretary Prof Malsawmliana kaihhruai inkhawmah hian Central YMA President Lalhmachhuana chuan, tun hnaia ram chhungah ruihhloin nasa takin a chim chho mek a, heti renga an kal chuan Mizo thalaite hi ruihhloin a suat nasa dawn a. Ram leh hnem dinchhuah lehna turin nang leh keiin mawh an phur tih a sawi.
Lalhmachhuana chuan, “Pathian rinchhan chunga ke kan pen zel chuan, ruihhlo nena kan indonaah hian hnehtu kan ni ngei ang,” tiin, CADS member tharte a lawm lut a ni.
Inkhawmah hian Central YMA Fin. Secy M.S. Ralte in hunserh a hmang a, Asst Secy Fabian Lalfakawma chuan inhmelhriat tirna hun a hmang a. Treasurer Roneihthanga’n lawmthu sawiin hun a khar.
CADS-ah hian Aizawl khawpui chhung YMA branch hrang hrang atangin member 42 awmin, Convener hi Roneihthanga, Treasurer Central YMA a ni.