Madhya Pradesh-a Gwalior khawpuia sorkar damdawi inah Pathianni zing hma takah khan kangmei a chhuak a, damlo 180 chuang hmun hima thiar chhuah an ni.
Thuneitute chuan thi leh hliam an awm lo niin an sawi.
Kangmei hi zing dar 01:00 vela Gajra Raja Medical College peng pakhat, Kamla Raja Hospital-a gynaecology department-a Intensive Care Unit (ICU)-a air-conditioner atanga chhuak niin Gwalior Collector Ruchika Chouhan-i chuan a sawi.
ICU-a awm mi 13 telin damlo 190 chu him taka lak chhuah niin damdawi in dangah dah an ni a. Damdawi in vengtuten tukverh darthlalang tichhiain ICU-a awmte hi an thiar chhuak a, super speciality hospital-ah sawn an ni tih Chouhan-i chuan a sawi.
ICU-a awm leh ward danga awmte an him vek tih a sawi a, an chhui zui dawn tih a sawi bawk.
State Public Relations Department chuan short-circuit vanga chhuak niin an ngai tih an tar lang a. Vengtu ward boy-ten rang tak damlote hi an buaipui nghal a, Gwalior Municipal Corporation-a kang thelhtuten an thelh mit zui nghal.
Damlo awmpuitu pakhat chuan, “Damdawi in hung chhung hi meikhuin a khat vek a. Thawktuten damlote an sawn a, tunah pawh hian damlote hi an tha a, hmun tharah sawn vek an ni,” a ti.