Aizawl: BJP Mizoram President Vanlalhmuaka chuan Prime Minister Narendra Modi kaihhruai BJP sorkarin Mizo mipuite mamawhna hrethiam taka Assam Rifles (AR) ram luah mipui hnena hlan let a ni chu India hmarchhak hmasawnna hma-hruai a nih thu a sawi.
Thawhtanni khan BJP pisa, Mipui Run-ah thu thar thehdarhtute kawmin Vanlalhmuaka chuan kum 1980 atanga AR-in an luah tawh, Mizoram mipui tana hlanna hunah Union Home Minister Amit Shah-a’n a hman hmanpui leh Mizoram mipui lawmpuina chibai bukna a hlan chu BJP Mizoram chuan lawmawm an tih thu a sawi.
Vanlalhmuaka chuan Mizoram khawpui chu mipuite tan hmun awl tlem tawh tak a nih hrethiam a, Mizo mipuite beiseina tihhlawhtlinsaka AR hmun, mipui tana a hlan let chu PM Modi duhdan a nih thu Shah-a’n a sawi chu Mizoram mipuite a duhsakzia leh a zahzia a tilang chiang hle tih a sawi.
Aizawl laili atanga Zokhawsanga AR sawnna tur tihfel a ni ta chu Mizo mipui tan chhinchhiahtlak, tuchhuan thlenga hriatreng tawh tur a nih thu sawiin Vanlalhmuaka chuan, “Kum 1987 atanga AR sawn chhuah tuma sorkarna changtu apiang hma lakna chu a ropui a. Shah chu hmalatu langsar ber a ni a. Tun dinhmun kan thlen theihna atan hian a ni tluka thawhlawk an awm lo,” tiin, union home minister laka Mizo mipuiten lawmthu sawi an ba niin a sawi.
Vanlalhmuaka chuan BJP Mizoram leh larsap ngenna angin Shah hi programme awmsa tidang-lamin zan a riak tih a sawi a. State BJP President kaihhruainain BJP MLA pahnih, Beichhua leh Hrahmo, MADC leh CADC CEM leh party hruaituten Raj Bhavan-ah an kawm a. Mizoramin a neih chhun Lengpui Airport chei that a tul thu thlenin CM Lalduhoma hnena thurawn a pek tawh angin airport hmasawn nan AAI-in a tul anga chei that hna thawk tura ngenna ziaka an thlen thu a sawi.