Aizawl: Art & Culture Minister C Lalsawivunga chuan Dungtlang ram leh a chhehvel bawra hmanlai Mizo pi leh pute khawsak kum leh hunte hriat tumin thlan hlui atanga ruhro laichhuakin zirchiang turin USA-ah thawn tih House a hrilh.
Thawhtannia Assembly Session-a zawhna leh chhanna hunah Aizawl West III bialtu MLA VL Zaithanzama zawhna chhangin Art & Culture Minister chuan, Art & Culture department hnuaia Archaeological Wing atangin hmun hrang hranga Exploration & Excavation neih thin a nih thu a sawi a. November 2024 atanga January, 2025 chhung khan Dungtlang khaw hmun hluiah Archaeological Excavation neih a nih thu a sawi.
Dungtlang khaw hmun hluiah hian pi pute hmun hlui leh hmanraw hlui te phawrh a nih thu a sawiin, “Thlan hlui atanga ruhro laihchhuah chu carbon dating atan a sample hi Florida, USA–ah thawn a ni a. He lai hmuna hmanlai Mizo pi leh pute ruhro te hi engtik kum velah nge an phum tih a hriat theih ang a. Chu chuan kan pipute Dungtlang ram leh heng lai bawra an khawsak hun hi eng emaw chen a rawn hrilhfiah thei dawn a ni,” C Lalsawivunga’n a ti.
Art & Culture minister sawi danin, pi leh pute thlang tlak danah hian Art & Culture department chuan hma nasa takin a lo la tawh thin a, Tribal Research Institute hian pi leh pu hnam hrang hrangte thlang tlak dan leh an lo khawsakna hmun hluite chhinchhiahin lehkhabute, research leh seminar te a buatsaih tawh thin a ni.