Home Minister K Sapdanga chuan sorkarin a pawng a puiin raltlante chhinchhiahna biometric indentification tih an hnial loh thu leh, Mizoram mipui leh sorkarin central atanga chhinchhiahna atana rawtna an siam a pawm theih tur chi a nih chuan bul tan theih reng a nih thu house a hrilh.

Assembly Session neih mekah nimin khan zawhna leh chhanna hunah Lawngtlai West bialtu MLA C Ngunlianchunga zawh belhna chhangin home minister chuan raltlante biometric data lak chungchang hi central sorkar thuchhuak a nih thu sawiin, hemi chungchangah hian Ministry of Home Affairs (MHA) nena indawr tawn mek zel a nih avangin hmalak dan tur ruahman fel a la ni loh thu a sawi.

Home minister chuan MHA hi an la inpeih loh thu sawiin a tirah Mizoram sorkar tihtir a tum portal chu innawr kirna tur a nih avangin objection siam a nih thu a sawi a, “Hei hi criminal case neite chhinchhiahna atan portal a ni a, ‘raltlan mi mangangte chhinchhiahna atan hman remchang a ni lo ve,’ tiin rawtna kan thehlut a. Chuvangin, refugee an ni lo va, displace people-ho chhinchhiahna atan rawtna kan siam a, an la rawn chhang lo va; central-in an rawn chhan hun hunah mipui leh sorkarin a pawm theih tur chi a nih chuan bul a tan theih. A pawng a puin biometric identification tih hi hnial a ni lo va, a tih danah erawh chuan tha lo nia a hriat chinah state sorkarin tanna chin a nei,” tiin house a hrilh.

‘Raltlante puihna hi secret fund a ni’

Home minister chuan Bangladesh, Manipur leh Myanmar atanga Mizorama raltlante puihna sum chu secret fund a nih thu a sawi a; raltlante chu fimkhur taka enkawl dan tur ngaihtuah mek a nih thu house a hrilh.

Thawhtannia Mizoram rorelna in sang bera thutkhawma zawhna leh chhanna huna member-te zawh belhna chhangin home minister chuan, an hriat tlan angin Bangladesh, Manipur leh Myanmar atanga Mizorama raltlante puihna chu corkar laipui atanga secret fund, receipt awm miah lo. A hmanna erawh invenna atan chipchiar taka vawn a nih thu a sawi.

District tina deputy commissioner-te kaltlanga hman thin a nih thu leh a hman dan a inan loh thu a sawi a. Secret fund hmanna hi chipchiar taka sawi hi member-te pawhin tha an tih a rin loh thu a sawi.

Hetih lai hian sorkar laipuiin raltlante tana buhfai a pekte chu a dawng turten an dawng kim tawha a hriat thu a sawi bawk.

Raltlante hi mi khawngaihthlak, in leh lo châna hak lai nena raltlan thahnem tak awm phenah, harsatna siam tam tak an lo inzep ve bawk tih sawiin home minister chuan, “Raltlan lo chhukte pawhin harsatna siamte pawh hnawk an ti a. An tana harsatna thlentu an nih an hre ve tho a. Chuvangin, khauh taka enkawl tur chuan a wholesale chuan siam a har a. Amaherawhchu, eng emaw tih a ngai tih chu sorkarin a hria a, fimkhur takin enkawl dan tur chu ngaihtuah mek a ni,” a ti.

K Sapdanga sawi danin, an chhiar laia an dinhmunah chuan Mizoramah raltlan, Bangladesh atangin mi 2,217, Manipur atangin mi 2,633 leh Myanmar atangin mi 33,505, an vaiin mi 41,355 awm mek anga ngaih a ni.