- Dr. JT Vanlalngheta
He ka thu ziah leh tun tuma Zu khap Burna Dân En Nawn chungchâng hian inzawmna a nei lo va, Bible tawngkam inhrilh thar lehna niah ngai ila a tha ang e.
Hla pakhatah hian ‘ZU’ hi ‘Sual tinrêng bul a lo ni e’ tih hi ziaha sak a ni bawk a; he hla hi a phuah hun a rei tawh nain zu chungchâng sawi chhuah a nih hian tuten emaw a changa tlar pakhat hi sawi chhuakin mahni duh dan tih puitlin nân hman an tum thin a, a zia lo thin hle; hei hian he hla chuai mai tura ngaih hi a tuar thar leh thin a ni. A châng dang hi chu a tha lo tihna pawh a ni lo; mahse, he lai tlar hian Bible a kalh avângin hla hrim hrima hi Kristian nihna tarmit atanga thlìrin hla tha lovah a chantir si. Isua zuitu tling lo tak kan nihna rilru atanga thlirin, he hla hi Pathian Thu nen a inmil lo tih hriat a tha hle mai. Sermon ilova, Bible chang sawi/chham sual palh hi chu a inhriat thiam theih a; mahse, patling, nu tling, rawng bâwltu tling ni âwma ngaihten sual tinrêng bul anga ZU an han chhuah leh thin hi chu kan Pathian Lehkha Thu zah lohna a tling hial ang em? “Tangka sum ngainat hi sual tinrêng bul a ni si a; chu chu thenkhatten an awt a, rinna chu an kalbosan a, anmahni leh anmahni lungngaihna tam takin an inchhun tlang ta chuk a” tih Bible-ah kan hmu a ni (1 Timothea 6.10).
Mizoram Kristian kan nihna pawh kum 130 zet a ni tawh a, ringtu kan nih chuan ‘zu’ hi sual tinrêng bul a ni lo tih hriat tlân a hun tawh tak zet a ni (ZU sawi mawi erawh chu ka ni hauh lo tih he thu ziah chhiartute hian min hriatpui thung ula), he hla châng avâng hian he tawngkam pawh hi mual liamtir tawh ila, chutia kan tih chuan kan Pathian chu kan lamah a tang ang a, A mal sâwmna pawh kan dawn phah bawkin a rinawm; Bible -in a sawi tum ni lo anga sawi hi chu Diabola hmanrua a ni thin a; hla la phuah zêl tûrte pawhin Bible zirtírna kalha kan phuah lohna tûrin he hla hian kan thinlungah thu sawi mawlh rawh se.