Thawhtanni zing lama Aizawl Treasury bazar kan chhanah Mizoram Police chuan rinhlelh man an nei rih lo.
Nimin zing lam dar 3 vel atang khan Aizawl Treasury Square bazar-ah kangmei chhuak tan nia hriat a ni a. He thu buatsaih lai thleng hian kangmei chhuah chhan hriat a la ni lo va; helaia dawr tê 63 bawr vel leh thingpui dawr chu a kang ral vek a. Thanzami Tochhawng building chhawng chung bera thinga rel, PAMRA office chu bungrua engmah chuh hman lohvin a kang ral vek a. I&PR Directorate building tukverh eng emaw zat a kang chhia a. Bazar epa awm Assembly House erawh a kang kai nasa hman lo hlauh thung.
Kangmei hi zing dar 7:30 vel khan Fire department leh mi tlawmngaiten an thelh mit thei a. Nimin vek khan Venghlui leh Tuikual South khawtlang hruaitute chuan bungraw kangral senghawi hnatlang an nei nghal.
Treasury Bazar-ah hian chhungkaw 100 velin ei an zawng ni a hriat a ni.
Kangmei chhuahna hi I&PR Minister Dr. Vanlalthlana, P&E Minister F.Rodingliana, Sport Minister Lalnghinglova Hmar leh AMC Mayor, Deputy Mayor, Khatla South leh Venghlui ward hruaituten an tlawh nghal a ni.
The Zozam Times zawhna chhangin Aizawl Police Station OC Lalnunmawia chuan nimin tlai thleng khan kangmei chhuah chhan hi hriat mai theih a nih loh avang leh hnatlangin kangmeiin a tihchhiat bungruate an lo senghawi tawh avangin kangmei tichhuaktu nia rinhlelh pawh an la neih loh thu a sawi a. Forensic hovin evidence an lak thu sawiin, an thu ngaihchan mek thu leh theihtawp chhuaha a chhuizui hna an thawh mek thu a sawi.
Bazar atan siam that tum tawh lo
Aizawl Mayor Lalrinenga Sailo chuan Aizawl Treasury Bazar kang chu bazar atana hman leh tura siam that tum a nih tawh loh thu a sawi.
Bazar-a kangmei chhuak hi nimin chhung khan mayor chuan tlawhin he huna thu thar thehdarhtute zawhna chhangin Treasury bazar chu tiamchin awm lova khat rih a nih tur thu a sawi a. He lai bazar mai bakah dan lova kawngsira inzawrhnate tihtawp a nih tur thu a sawi bawk.
Aizawl Mayor chuan Treasury bazar-a thute tan hian a thlang lawka AMC Complex, Tuikual South-ah an tan hmun a awm thu a sawi a. Tuikual South huam chhunga kawngsira Inrinni-a inzuar thinte pawh inzawrh phalsak a nih tawh loh tur thu a sawi a. Kawngsira inzawrh hrim hrim chu khap a nih thu leh phalna nei te aia dan lova inzuarte ten advantage an neih chu thil nihphung a nih loh thu a sawi.
Mayor hi Tuikual South awmna ward XII bialtu Deputy Mayor R. Thanglura leh Venghlui awmna ward XVII bialtu David Zohmangaiha bakah corporator eng emaw zatin an tawiawm a ni.
Chhinchhiah danin Venghlui area lamah dawr 53 a awm a, heng zinga 35 chu kang chhe zingah an tel a, Tuikual South lamah hian dawr 29 a kang chhe bawk.
Hetihlai hian, kangmei chhuak chungchangah Venghlui leh Tuikual local council-te chu Aizawl Press Club-a an thukhawm zawha thuchhuah an siamah, kangmei chhuak avanga a tuartu, ni tin eichawp zawngte an tawrhpui thu an sawi a. Chutih rualin, bazar hi tha zawka chinfel thuai a nih theihnan sorkar department-te chu kangmeiin a tihchhiat bungrua senghawi leh siam that hna thawh bak chu tumahin kut lo thlak rih lo turin an ngen.