Aizawl: Finance changtu, Chief Minister Lalduhoma chuan sum leh pai inrenchem kum, ‘Year of Consolidation’ chu a tawp tawh tih sawiin, kum kal mek ang em ema inrenchem an tum tawh loh thu house a hrilh.
Thawhtannia Mizoram rorelna in sang bera zawhna leh chhanna hunah zawh belhna chhangin chief minister chuan sorkar sum leh pai inrenchem kum, ‘year of consolidation’ hi austerity measure nena unau kalkawp a nih thu sawiin, “Minister-te pawhin entitle chin kan la tawh lo va, MLA-te pawh kan entitle chin kan intihniam a. Official-ah pawh theih ang angin kan ti,” a ti.
Chief minister chuan bangla an enkawl leh motor chungchangahte a inren thei ang bera an kal mek thu sawiin, “Bangla luah pawhin renovate vak loh tur, parda leh sofa-set te pawh a thara thlak kher lova a awmsa rin mai tur, a chhe deuh chu Mizo siama thlak tur tih kha kan kalpui zel dan a ni a. A hlawk hlein ka hria,” a ti.
Year of consolidation chu a tawp tawh tih sawiin, kum kal mek ang em ema inrenchem an tum tawh lo a. Mahse, a theih chin chinah austerity measure kalpui an tum thu leh, zin veivahnaah pawh a tlem thei ang ber leh a zangkhai thei ang berin an kal tih a sawi bawk.