Aizawl: Rajya Sabha MP K Vanlalvena chuan Bairabi atanga Sairang rel kawng siam mek chu kumin July thlaah zawh fel theih a nih tur thu Dy Chief Engineer, Railway-in a hrilh tih Parliament House a hrilh.
Thawhtanni khan Parliament budget session neuh mekah Indian railway hnathawh sawiho a ni a. He hunah K Vanlalvena chuan thu sawiin Bairabi atanga Sairang rel kawng siam mek chu km 51.38-a thui a nih thu te, rel station pali – Hortoki, Kawnpui, Mualkhang leh Sairang Sihhmuite a nih thu a sawi a. Leiverh 32, lei tan 15, lei lian tham 55, lei tenau 89 leh kawngpui chunga lei dawh panga, kawngpui hnuaia lei dawh pali an awm thu sawiin hna thawh tur zawng zawng zaa 95 thawh zawh a nih tawh thu te a sawi.
K Vanlalvena chuan he hna thawh zawhna tura railway ministry-in sum a dah Rs vbc 8,215 atangin Rs vbc 7,714 hman ral a nih tawh thu house a hrilh bawk.
Bairabi atanga Sairang rel kawng siam mekah hian lei sang zual bik paruk a awm thu leh lei ban sang ber chu metre 114 a sang a nih thu a sawi bawkin, leilung ngheh tawk loh vangte, ruahtui tam vangte, kawr thuk tak takte avangin hna thawhna hun a tlem thu sawiin, hetiang harsatna kara tluang taka he hna zawh a nih theih tawh dawn avangin union railway chungah lawmthu a sawi bawk.
Sairang rel kawng hawnna programme hi neih a nih huna Aizawla lokal vek turin K Vanlalvena chuan MP dang zawng zawngte chu a sawm.