Work Order awm lova hnathawh a tam tih Chief Minister Lalduhoma chuan sawiin, member Robert Romawia Royte hming a lam chhuah avangin inhnialna a chawk chhuak titih a, Speaker Lalbiakzama’n ‘point of order’ a sawifiah phah.
Assembly Session neih meka nimina zawhna leh chhanna huna Lawngtlai West bialtu MLA C Ngunlianchunga zawhna kal zelah chief minister chuan contract hna rei tawh, thawh si loh a awm nual tih a sawi a. Kum thum china upa contract pek tawh, an lo thawh tawh chin chu bill an pek thin thu a sawi a. Thawk miah lo chu thawk duh lo leh thawk thei lova an ngaih thu sawiin lapse deposite-ah eng emaw zat an puang tawh tih a sawi.
Zawhna neitu, Hachhek bialtu MLA Robert Romawia Royte zawhna chhangin chief minister chuan a zawttu contract hmuh zingah work order awm lova hnathawh a tam a, document awm lo lai chu an buai lai a nih thu a sawiin, “File an dap a, thuneitu sang zawkte thupek angin tih a lo ni hlawm. Contract hna hi administrative approval, expenditure sanction leh work order a ngai a. Hetiang awm lo chu bill dawn se, an bum dawn nge bum dawn lo tih pawh kan hre ta lo,” a ti.
Hminghmerha a lam chhuah hnuah member Robert Romawia Royte ding chhuakin Rajiv Gandhi Stadium-a phullem phah chungchangte a sawi fiah mek laiin chief minister chuan, “Insawifiahna hun kan pe zel dawn em ni le? Ruling lam niawm takin an insawifiah nghal zel a. House hi inchhan zelna leh inhrilhfiahna tur a ni lo,” tiin a lo hnial.
Lalduhoma chuan tun session chhungin house-a member-ten mi thusawi laia thu an sawi duhna, ‘point of order’ an hman dik tawk loh thu a sawi zui.
Hetia an inchhan mek laiin Assembly Speaker Lalbiakzama inrawlhin ‘point of order’ chungchang a sawi fiah a, member-te chu a awmziate chhiar ngun turin a chah.
Speaker chuan ‘point of order’ an hman theihna chu an rules kalhin thu an sawi em tih leh constitution kalhin thil tih a awm em, dan kalh a awm em tih a nih thu sawiin minister emaw, tute pawhin statement pe tura an insawmin statement pek laia lo inauhbuai emaw, lo intihbuai emaw hi ching lo turin a ngen a. “Member-te zalen theuh ka duh a, duhzawngte an sawi khap hi hrehawm ti mi ka ni. Mahse, member-te zalenna ka pek duh avangin ‘Speaker hi nep mah mah’ tih hi a ri ring a. Inkhap ngai emaw, inthuttir ngai emaw ang boruak chu thleng lo hram se ka duh,” tiin house-ah a sawi.