Israeli sipaiten Gaza Strip an kap leh a, Hamas enkawl health ministry chuan Palestinian 220 vel an thi niin a sawi.
Israel Defense Forces (IDF) chuan an kah hi Hamas hmun bik a nih thu an sawi.
Gaza-a Deputy Interior Minister Mahmoud Abu Wafah leh Hamas security official hotu lian an thi nia sawi a ni bawk.
Tun hi January 19-a inkahhai puan a nih hnua thlawhna hmanga Gaza beihna lian leh ber a ni a. Inkahhai pawt sei tur hian inbiak mek niin inremna a la awm lo.
Ramadan lai a nih avangin khaw var hmaa chaw an ei lai mekin beih an ni tih hmutute chuan an sawi.
Israeli indo thlawhna 20 chuang an chungah an thlawk a. Gaza City, Rafah leh Khan Younis an kap zui niin an sawi.
Israeli Prime Minister Benjamin Netanyahu leh Defence Minister Israel Katz ten Thawhlehni tuka beihna hi thu an pe niin PM pisa chuan a sawi.
“Israel hian tun atang hian Hamas sipaite chakna hi a chhu zel dawn a ni,” a ti a. Beih hi kartawpa IDF-in a duan niin politics-a hotuten an pawm hnuah tih a ni ta tih sawi a ni bawk.
UN-a Israel Ambassador Danny Danon chuan Hamas-te chu an mi hrente chhuah turin a ti leh tawh a, ‘kan hmelmate lakah khawngaihna kan lantir dawn lo’ a ti.
Israel leh Hamas inkahhai chhunzawmna tur hian palaiten hna an la thawk zui zel a, March 1 khan thawh khatna a tawp tawh.
US chuan April thla laihawl thleng pawh seia Hamas mi hren chhuah leh Israel-in Palestinian a mante chhuah chhunzawm a rawt a. Israel chuan a duh mai laiin Hamas hian pawh sei lohva thawh danga inkahhai puang tura inbiak a duh zawk a, an la inrem thei lo.
Tuna Israel leh Hamas indona hi October 7, 2023-a Hamas-ten Israel beia mi 1,200 chuang an thah leh mi 251 hren tura an hruai atanga intan a ni.
Israeli sipaiten an bei let zui nghal a, mi 48,520 chuang thi tawhin a tam ber hi civil mi an ni tih Hamas enkawl health ministry chuan a sawi.
Gaza-a mi maktaduai 2.1 cheng tam zawk chu an baihvai mek a. In ding 70% vel a chhia a, damdawi in, tui leh thli tihthianghlimna a chhe vek a. Ei leh in, tuialhthei, damdawi leh awmna tur a awm meuh lo.