- Reuben Lalnunthara Hnamte
Mihring ni a kan lo piang ve a nih chuan tumah hi chhungkhat neilo tawp leh thiantha nei lo chu kan awm kher lovang. A bikin mizote phei hi chu kan nI leh zual bik maithei a; hnamdangte hi chu laichin neilo tak takte pawh an awm maithei e. Mizote hi chu kan la tlem tham deuh bawk a, kan inhre tlang deuh vek emaw tih mai tur a ni a. Thingtlang zawkah te phei hi chuan inchhungkual thim them deuh vek hi an ni thin. Khawdang atanga thingtlang zawka han awm phei hi chuan tawngsual mai te pawh hi a awl hle. Aizawlte angah pawh hian a nihna chin a awm tho mai. Chhung leh khat han sawi nikhua hian kan lo in chhungkual duh khawp mai. Mizote hi inpumkhat tak leh innel tak hnam kan ni a. Hnamdangte mak tih leh awh khawp hian State dangah han awm nikhua phei chuan kan inthianthatna leh innelna hi a lang thin a a nuam thin khawp mai. Hnamdangte pawh hian mizo society inpumkhat tak mai leh inpawh tak hi mak an tiin an awt hial thin a ni.State danga School leh Institution thenkhat mizote min hrechiang deuh phei hi chuan ‘ Mizote hi chu panga chin an nih tawh chuan, an inthiantha in an inthurual tlat zel a admit chi an ni lo’ ti a sawite pawh hi an awm thin. Hengte hi a tha a a hlut em em rual hian a that lohna kawng thenkhat I han thailang dawn teh ang.
Kan inthianthatna leh kan innel lutukna hian ram hmasawnna hi a dal thin em aw tih ka ngaihtuah ve thin. Kan inlakbingna tak hi kan hman thiam loh chuan hmasawnna kawng dal theitu leh midangte tana hnawksak a ni ve tlat a ni. Politics thilah pawh hian hman atang tawhin mahni party leh vua leh vang induhsakna hluar lutuk hian ram hmasawnna a dal thei tlat a ni. Sorkar hna emaw han la dawn se, mithiam leh tling te aiia, mahni vua leh vang leh party induhsakna awm tlat thin hian midangte rilru a tina in hna in a tuar bawk. Tehkhin nan Zirtirtu lak chung changah pawh, a thiam leh tha te aia mahni party leh chhungte duhsakna a awm tlat chuan Sikulin a tuar lo thei lo. Vawikhat laia sorkar sikul a kal tur an awm mang lo va, Private an bawh ruih ruihna chhante pawh kha, thawktu thahnemngai leh thiam an awm tawk loh vang a ni thei a ni.
Kan Police Department angahte pawh party leh chhungkhat induhsakna a nasat lutuk thin avang hian police laktlak tak an tlem phah em em ta mai a ni. America angahte chuan police tlin hi thil har tak a ni a. Policea an tlin chuan an lawm em em thin a, an chhungkuate in lawmnate pawh an siam hial thin. Sorkar Department angah te pawh hna thiam lo an tam chuan ram hmasawnna awm thei lo. Ram hi kan hmangaiha a hmasawnna tur kan duh a nih chuan dik tak leh a nih tur ang taka hnathawktu lak te pawh hi a pawimawh hle mai. Hengte hi kan ram angahte chuan kan thanmawhbawk pakhat a niin ka hria. Ram hi kan hmangaiha a hmasawnna tur kan duh tak tak a nih chuan heng induhsakna uchuak hi kan bansan a ngai. Sorkar chuan dan tha tak tak a zam a a nei bawk thin a. Nimahse, dan aiin hmelhriat inzahna leh induhsakna uchuak avang hian Dan pawh hi a nih angina kenkawh a ni lo fo thin. Thil tihsual ah pawh mi hausa , chhungkhat, hmelhriat inzahna avang hian a nihna tur anga dan hi kenkawh loh hi a awm thei a, hei hian mipuite ah lungrual lohna leh rilru natna a thlen fo. Ram hmasawnna tura hnathawh chung chang- Building sak emaw, kawng siam leh thil dangahte pawh thiantha, chhungkhat leh party induhsakna nasa lutuk thin avang hian hna chhe tak taka thawh kan hmu fo thin a, chu chuan ram hmasawnna a dalin, mipui an lungawi thei lo thin a ni.
Politics hian khawvel ramtin mai hi a chiahhneh em em tawh mai a; thuneitu nih leh lal duhna, chu mi ruala hauhsakna awm thei um hian mitin mai hi kan tlan tawh a. Ram hruaitu thenkhat kan hriat lar zual – Russia, North Korea leh Burmate pawh hi an ram hruaitute mi mal hauhsakzia kan hria a. Chutih laiin, North Korea leh Burma ramte chuan an ram mipuite an rethei em em a, an ram hruaitute lah mi hausa tawntaw an ni thung si. Chu lalna leh hauhsakna um chuan Democracy ram angahte pawh hian mi tamtakin Politcis hi an atchilh mek a ni. Mi tamtakin politics an atchilhna chhan chu ram hmangaiha siamthat lam aiin, mahni hlawkna tur hamthatna an um vang a ni. Kan ram India ngei pawh hi politics atchilhna hian a tuam hneh zia kan hria a. Inthlan dawnah te phei chuan sum tam tak a inleinate, inthahate a thelng tam thin hle. Kan ramah ngei pawh hi politics hian min luhchilh thuk ta hle mai. Ram hmangaih leh siamthat duh an awm rualin chu mi phena mahni hlawkna leh hamthatna um hi kan pung zel a nih hi.
Politics thlichhia hian kan ram hi min tuam nasa tawh a, kan pathian deuhthaw ta hial zawng a nih hi. Party hrang hrangin hnehna changin ro an lo rel tawh a, ram hmasawnna chu awm bawk mahse, ram tana thatna leh hmasawnna tak tak hi chu a thleng tam tawk lo niin ka hre thin. A lehlam thlir chuan chuan kan phutawk sorkar kan nei tih maite hi a hahdamthlak phian bawk a. Joseph De Maistre a chuan “Ram tin hian sawrkar mahni phu tawk theuh an nei a ni.” a lo ti ve tho mai. He kan politics thlichhia hian kan ram ringtu nun chu a tihnungtawlh mek a ni. Kan inpumkhatna hi a tha zawngin hmang ila, kan tanrual a tul khawp mai. Ram hruaitute’n kal dik lohna emaw an lo nei a nih chuan kan sawisel tur a ni a, khalhngil kan tum pawh a tha e. Nimahsela, mizo kan nihnaa kan inpumkhatna tichhe tur erawh chuan kan fimkhur a ngai khawp mai. Tin, kan ringtu nihna tidal leh min ti hnungtawlh zawnga kal hi pumpelh dan zawn hi a pawimawh viau bawk a ni. Kan inpumkhatnate, kan kristianna tidal tur zawng hian runin kan awm mek a. Mahni hamthatna leh sum leh umna hian sex hmansualna, ruihhlo, ruk ruk, chhungkaw kehchhia a thlen mek a nih hi. A langin ram ralmuang tak anga mite’n min hriat lai hian kan chhunglama chhiatna nasa takin kan hnam leh ram hi min run mek a ni. 1 TIMOTHEA 6:10 ah chuan “Tangka sum ngainat hi sual tinrêng bul a ni si a; chu chu thenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a” He sual tinreng bul hian kan ram min tichhe mek a, he kan mimal nu, chhungkua, ram mintichhe mek tu tangka sum ngainatna hi sirah I hnawl ngam ang u hmiang.