- K. Hmingthankaia
Treasury Bazar hi Aizawl khawpui laili elkhena awm, Sawrkar hmun pawimawh leh Police tlaivara duty awmna-ten a hual vel a ni. Aizawlah hian mihring hi tlaivarin an vei tawh bawk si. Tin, a kan(kang) hun an sawi hi zinglam dar 3 hnu, zin haw leh, eizawnna vang leh exer laa mi tam tak veivah tawh hun a ni. Heti tak maia a kangfai thei leh a kangral hma lutuk hi a mak ka ti a ni.
Treasury Bazar hi zan lam, a ruah vek hnu hi chuan thil han kang awlsam lutuk tur hi awmin a lang lo. Kawrawng chho vek, bang leh pindanna nei lo, a bang lah chu, lehlam lehlamin cement bang a ni mai si. A khat tawkin ban a ding zeuh zeuh a, sang takah rangva inchung a awm leh a. A dawhkante lah, sa sahna dawhkan chhah pui pui leh, sa sahna lo pawh, rinawm tak tak, chuti taka han kang awlsam puat puat tur chi niin a lang si lo. A chhuat lah lei ni bawk si, kang thei tawh dek dek chu, inhlat deuh ami pawh, chuti taka an kangral chak lutuk hi chu a mak a ni.
Treasury Bazar hi a thui thla ve hle a, khawimaw laiah chuan enge maw lo kang palh ta pawh nise, tu emaw chuan hmuh vat awm tak a ni a. Tin, a awmdan ngaihtuahin, khawilai pawh lo kang ta se, tu tan pawh thelhmih hi a harsat hmel si lo. Tin, hetiang hmun laili, kawngthlang lam leh chhaklam atanga kangthelh motorin a phuh theihna, Fire Service motorin awlsamtea a thlen theihna hmun, a han kangral vek thei leh, building dang, khi-ah khi-ah, sang taka awm PAMRA Office-te an kangral vek thei hi chu a mak a ni.
Vanglaini chanchinbuin a sawidanin, ni 17.3.2025 zing dar 3 hnua kang tan, Fire Station-in dar 3.29-ah report an dawng. Khatla Fire Station atangin kangthelh motor dar 3.36-ah a thleng. Fire & Emergency Sevice leh mipuiin dar 7.30 velah an thelhmit thei. Kang a awm thu an hriat atangin kangthelh motor chu a thleng hma hle. Mahse, engatinge an thelhmih nghal mai theih loh le? A hmunhma awmdan ngaihtuahin thelh a har hmel si lo. Nge, an thlen hian a lo kang nasa tawh hle em ni le? Chuti a nih chuan, zing dar 3 hnu vela kang tan, thil kang chak tak tur awm awm pawh lang lo chu, dar 3.36 atanga thelhmih mai theih loh chu eng vang nge ni ta ang le? A awmdan ngaihtuahin, a hmu hmasatu tan pawh thelhmih mai theih hmel niin a lang si. Mahse, Concrete building chhunga thingpui dawr leh, sang taka awm Office thlenga a kangral vek hi a mak ka ti deuh hlek a ni e. Engpawhnise, Forensic lamin an enfiah mek an tih kha maw.
He laia eizawngte an khawngaihthlak hle mai, kan mi hriat zawngte an awm ve nual si a. A theih ang anga chhawmdawlna leh tanpuina hmu theuh thei sela ka ti hle mai.
AMC lamin helai hmun hi Bazar atan siam tawh lova, a thlanga building tha tak, AMC-in Bazar tur liau liaua an saka sawnluh vek a tum hi kei chuan tha ka ti hle. Achhan chu, helai kawng hi Treasury Square leh Tennis Court Square kalpawhna shortcut tha tak a ni. Thil zuar leh sa rimchhe tak tak leh, chempui lek uaih uaihna karah, tawt takin mipui kan vei lo thei si lova, a nuam lo thei hle a ni. Chuvangin, Sawrkar hian helai kawng hi ke-a kal nan mawi takin chei tha sela, a sirah thut hahdamna turte siam bawk sela, khawpui chei nan leh, mipui thawk lak hahdam nante a tha hle ang. Tin, a chung kha neihtir leh ngei bawk sela.