- Lalhminghlua Nkb, Kulikawn
Dt.14-3-2025 (Zirtawpni) kha Hindu kût Holi niin khawvela mipui tam berna ram, India ramah chuan rawng chi hrang hrang inthehin an lawm leh hut hut a nih kha. Kum eng emawti liam ta kha chuan hetiang hi milem pathian bia sakhaw serh leh sang tiin Mizo zingah lawm (celebrate) ve kan vang thei hle a tih theih awm e. Tunah erawh kan Kristianna pawh a thiangzau (liberal) ve zel, thenkhatin hetiang hi kan serh ta vak lo niin a lang. Kan insawithiam chawp mai zel!
Kan chhak ram Myanmar-ah khian tun ang thal lai hian hun hlimawm hmel tak mai tui intheh kût (Water Festival) hi an hmang nasa ve thin khawp mai bawk a. Mahse, Tahan vela kan Mizo unuate khian hetiang tui intheh kût hi chu Buddhist sakhaw serh leh sang nena inzawm a nih avangin keini Mizo Kristiante chuan kan lawm (celebrate) ve ngai lo an ti. An fakawm hle mai. Khawchhak lama kan zohnahthlak unaute Kristianna an vawnhimna kawngah an entawn tlak tak zet zet a ni.
Keini Zofate hian khawthlang vun ngoho kan ngaisang nasa mai si a, anni chuan India ram an rawn kalin Hindu serh leh sang hi thiangzau takin an rawn ti chhin ve zel mai si. Anni ho tihdan hi kan lachhawng ve zel niin a lang. Keini Mizo zingah pawh inthlahrung miah lova Hindu sakhaw vuantute kût, Holi kan lawmna social media vela pholang kan awm ve ta tuk tuk mek zel a nih tak hi. Hetiang zela kan kal chuan nakin zelah thiangzau taka Hindu kut lian Mahakumbh vel lawma Ganga luia inchiahte hi kan la awm mai ang tih a hlauhawm ta angreng hle mai. Kan Bible-a lal ropui leh fing, lal Solomona pawh sakhaw dang laka a thiangzauna kha a chhiat phah si a.
Thiangzau kalphung lam han hrut zel ila, tunlaia kan Mizo zaimite huikhawm thiam pawl thenkhat leh hetiang lam mipui en tura pe chhuaktu thenkhatte hian Pathian awm ring lote hmun laili an luah tam tir lutuk te, neih inang inkawp lampanga sawi neuh neuh kaite hi hmun laili an chantir mah mah ni hian a hriat thin. Hengte hian naupang zawk nunah kan Kristian zirtirna nena inmillo ngaihdan an thanhnan pui tir thei si a, kan ram tan thil tha a ni lo a ni. Hetiang thiangzau (liberal) kalphung hi keini Kristian ramah chuan kan sakhaw tihdalna a ni tih hriain mitin hian kan Kristianna tidal thei hi chu i mausam tlat ang u.