Aizawl: Tuiriala Aizawl bawlhhlawh paihna hmuna kangmei chhuak thunun a nih tak avangin Zirtawpni atangin hawn a ni leh dawn.
AMC thuchhuah tar lan danin Nilaini zana bawlhhlawh tawih thei lo paihna hmun, Solid Waste Management Centre (SWMC), Tuirial kang chu thunun a nih tak avangin hawn tawh tur a ni.
Chhiatna thleng leh palh thei laka invenna turin AMC thawktute leh bawlhhlawh phur motor driver leh helper-te chauh, SWMCah hian luh phalsak an ni dawn a, rag picker leh pawn lam mi luh phal a ni dawn lo.
AMC chuan bawlhhlawh tawih thei lo kara tawih thei awmin bio gas siamin kangmei a siam chhuak thei tih sawiin hei vang hian bawlhhlawh tha taka thliar hrang theuh turin mi mal tinte a ngen nghal bawk.
Tuiriala bawlhhlawh tawih thei lo paihna hi Nilaini chawhnu atang khan a kang a. Fire & Emergency Services Department leh AMC-a thawktuten thelh hna an thawk nghal a, Ningani chawhnuah an thunun thei ta a ni.
Kangmei a chhuah tirh hian AMC thuchhuah siamin a thelh hna tibuai lo tur leh kangmei chhuak avanga chhiatna nasa zawk thleng thei veng turin khar rih (temporarily closed) a ni tih an sawi.