Aizawl: Chawlhkar kalta Inrinni zana Pausianmuanga (PS Muanga), Champhai Bethel veng tualthih thuah Champhai Police in mi pasarih man tawh.
Thudawn danin, Inrinni zan khan PS Muanga (28), Champhai Bethel veng chu Chhangphut Field Pavillion atangin a tla a, damdawi in panpui a nih laiin a thi.
He thihna thleng chungchangah hian PS Muanga nu chuan Champhai Police Station-ah FIR a theh lut.
He thihna thlengah hian insual rawnna a thleng nia hriat a ni a. A mawhphurtua puh mi pakhat, Lalruatthara, Champhai Kanan Veng nia insawi chu Inrinni zan khan police-ah a inpe a. Champhai Police-in an chhui zui zelah thu zawhfiah turin mi paruk an man belh leh tawh a, thu an la zawtfiah mek a ni.
MZP Hqrs Champhai thuchhuah siamin, an executive member PS Muanga thihna chungchangah thil fel tawk lo awm ngei nia hriain, thihna chhan dik tak chhui turin Champhai Police Station-ah ngenna an theh lut a, pawi khawihtute chu an phu tawk hremna an hmuh theihna tura a tawp thlenga hma an lak tur thu an sawi.
Champhai Bethel VC pawhin thuchhuah siam bawkin, thil tisualtute dan anga an chunga rorel a nih ngei theihna tura hma an lak chhunzawm zel tur thu an sawi ve bawk.