Lionel Messi telna Argentina team chu kumin October thlaah India ramah an inkhel dawn a, Kerala-ah exhibition match an khel ang.
Argentina captain Messi hian kum 14 kal taah khan India a tlawh tawh a, kumina a kal leh chuan India rama vawi hnih a kalna a ni dawn a. Nikum November thlaah khan Kerala Sports Minister V. Abdurahiman chuan India rama Argentina kal tur chungchang hi a puang zar tawh a, Kochi-ah friendly match vawi hnih an khel dawn niin a sawi.
HSBC India chu Argentina team official partner an ni a, anni hian India rama football dinhmun chawikanna kawngah Argentina team hi an thawhpui dawn a, October thlaa inkhelh a nih tur thu pawh hi an puang a ni.
“Kan thawhhona zarah Lionel Messi telna Argentina football team chuan India ram an rawn tlawh ang a, October, 2025-ah exhibition match an khel ang,” tiin HSBC India-in an puang.
“Argentine Football Association (AFA) leh HSBC te chuan kum khat chhung atan India leh Singapore lama thawhhona thuthlung kan ziak a, 2026 World Cup qualifying khelh zawh hmain 2025-ah kan thawkho dawn a ni,” an ti.
India rama Messi kal hmasak tum chu September, 2011-ah niin, Kolkata-ah Venezuela nen World Cup qualifying match an khel a, Argentina chu Salt Lake Stadium-ah 1-0 in an chak a ni.