Lirnghing tuar, Myanmar hnena India-in puihna leh chhawmdawlna a thawn chhuah hmasak ber chu Pathianni tlai dar 05:45 khan mi 10 nen Mandalay International Airport-ah tumpui a ni tih Indian Army-in a puang.
Team thlengte hian field hospital an din nghal ang a, a dinna hmun turte an en fel nghal zui zung niin Indian Army chuan a sawi a. An hmanraw ken leh bungraw dang thahnem tak chu lirthei hmangin an damdawi in dinna turah hian an phur leh dawn a ni.
India hian Zirtawpnia magnitude 7.7-a na lirnghing a thlen hnuah khan Operation Brahma tiin Myanmar puihna tur hi a buaipui nghal a, Indian Navy lawngten Yangon panin chhanchhuah hna thawhna tur hmanrua an phur mek tih Ministry of Defence (MoD) chuan Pathianni khan a sawi.
Ministry of External Affairs kaihhruainain Headquarters Integrated Defence Staff, Indian Army, Indian Air Force leh NDRF te chu a tul anga che chhuak tura inrintir nghal an ni tih MoD chuan a tar lang bawk.
Indian Navy lawng pahnih, Satpura leh Savitri, Eastern Naval Command-a mite chuan Inrinni khan Yangon an pan a, puihna thil tam tak an phur a ni.
Anni bakah hian Indian Navy lawng dang, Andaman & Nicobar Command-a mi, Karmuk leh LCU 52 chu Pathianni khan Yangon panin an chhuak bawk.
Defence ministry chuan heng lawngah hian puihna thil chi hrang hrang tonne 52 an phur tih a sawi a. Thawmhnaw, tui in tur, ei tur, damdawi leh rikruma mamawh thil hrang hrang a tel a ni.
Hetih lai hian lirnghinna hmunah hian Pathianni khan ni hnih a liam tak avangin nung dama mi hmuh beiseina a chau tan a. Tun tuma lirnghing hi indonain a tihbuai, Myanmar-ah chuan kum tam tak hnua an tawrh nat ber a ni.