Aizawl: Zan khat riaka Champhai tlawhtu Sports Minister Lalnghinglova Hmar chuan Inrinni chawhnu khan Vanlallawma Indoor Stadium (VANIS) leh Keilungliah tuikhuah a tlawh a. A department chan dang Excise & Narcotics Department thawktute nen an inkawm bawk.
Vanlallawma Indoor Stadium-a tlawhnaah hian Lalnghinglova Hmar hi District Sports & Youth Office a thawktute leh Champhai District Basketball Association hruaitu ten an lo dawngsawng a. Champhai khawpuiin Mizoram Super League (MSL) a thlen tum a Basketball Backboard chhia chu a rang lama thlak sak tum a nih thu a sawi.
Lalnghinglova Hmar hian Keilungliah tuikhuah tlawhin, khualzinmite hip theihna tur a hmun tha leh khawtual mi te tan pawha eizawnna tling siam thei ni a hriat thu a sawi a. He hmun chei tura hmalakna pawh thui tak kalpui tawh niin, hna tan theih hun pawh hla lutuk tawh lo tura a beisei thu a sawi bawk.
Hemi ni vek hian Excise Minister ni bawk Lalnghinglova Hmar hian Champhaia Excise hotute pawh a kawm a. Assistant Commissioner C. Thangchuanga leh O/C Lalhmingthanga te nen Champhaia Excise & Narcotics Department mamawh leh hmalak dan turte sawiin, inkawmna hun tha tak an nei a ni.