Aizawl: Inrinni zana Kolasib District Jail-a tang mek tlan chhuak mi pakhat leh, a tlan chhuah theihna atana puitua puh mi pakhat nen Kolasib Police-ten Inrinni zan vek khan Silchar-ah an man.
Kolasib District Jail atanga tlan chhuak hi Seikholen Khongsai (45), Hemkhawthang, Saikot, Churachandpur niin, a tlan chhuah theihna atana puitua puh, a unaupa nia sawi ni bawk hi Ngamgin Khongsai (52), Hemkhawthang a ni.
Thudawn danin Seikholen Khongsai hi tun hnai khan âwmna leh khawsik avangin doctor hnenah hruai a ni a. Doctor thurawn angin chawlhkar kalta Ningani khan District Hospital, Kolasib-ah admit a ni a. Amah vengtu police inthiar hlanin Inrinni zan khan a tlan chhuak a ni.
Police-te chuan chhui zui nghalin Inrinni zan dar 8 vel khan Silchar-ah manin, a rual hian a tlan chhuah theihna atana puitua puh an man nghal bawk.
An pahnih hian thu zawhfiah an nih hnuah jail-ah dah luh nghal an ni.
Ngamgin Khongsai hian a unaupa Seikholen Khingsai hi jail atanga a tlan chhuah theihna atan hmanraw hrang hrangte a lo pe ru thin nia hriat a ni.