UD&PA Department, Aizawl Municipal Corporation leh Central YMA-te thawhhona hnuaia Thawhtanni khan Aizawl khawpui ‘Faina Hnatlangpui’ koh a ni.

Faina Hnatlangpui hi nimin zing khan Sikulpuikawnah UD&PA Minister K Sapdanga chuan hawngin, hemi rual hian YMA Branch Fai Inelna 2025 a khuh hawng bawk.

Hawnna inkhawmah K Sapdanga chuan fai tur chuan fai duhna an thinlungah an put hmasak a ngaih thu a sawi a. Aizawl khawpui faina tura Mizoram sorkarin ngaihtuahna nasa tak sengin hmalakna leh hmachhawp hrang hrangte a neih mek thu a sawi.

UD&PA minister chuan Aizawl khawpui faina leh thianghlimna atana pawimawh em em, hriselna atan pawh a nghawng thui tak nei thei tur damdawi in leh a kaihhnawih bawlhhlawh sawngbawlna changtlung tak, Tuiriala ‘Common Biomedical Waste Treatment Facility’ chu Aizawl Smart City Ltd.-in a sak hna a zawh tawh thu leh April 1, 2025 atang hian a takin hna a thawk tan tawh dawn tih sawiin, “Mizoram a la awm ngai lo a ni a, tunah chuan Biomedical Waste Management Rules 2016-in a phut ang ngeia damdawi in leh a kaihnawih bawlhhlawh kan sawngbawl thei tur chu phurawm hle,” a ti.

Central YMA Vice-President Prof. Lalnuntluanga kaihhruai inkhawmah hian Aizawl Deputy Mayor R. Thanglura leh Central YMA President Lalhmachhuana ten thu an sawi a. Inkhawmah hian UD&PA department hotute, AMC hotute leh Central YMA hruaitute bakah a bulhnai YMA branch aiawhte an tel.

Inkhawmah hian UD&PA minister chuan Central YMA hruaitute hnenah bawlhhlawh bawm lian 300 a hlan bawk.

Faina Hnatlangpui koh ni hian local council leh branch YMA-te kaihhruainain veng hrang hrangin ruahmanna siamin mahni remchan danin an veng chhung theuha bawlhhlawh then faite leh tuiluankawr tifai tein vengchhung mipuite an hnatlang a ni.

Heng bakah hian Aizawl khawpui chhunga hmun bawlhhlawh zual thlan bik te thian fai turin mi thahnemngai leh tlawmngai te an thawk chhuak bawk a. Mahni venga rokhawlhna eng emaw avanga hnatlang huaihawt thei lo te pawh a remchan ang anga mahni in leh a vel tihfaina hun atan lo hmang tur leh, mahni veng kher lo, a remchanna hmun hmuna lo thawk chhuak tura ngen an ni bawk.

UD&PA, AMC leh Central YMA tangkawp chuan kum 2025 – 26 chhung atan Aizawl khawpui faina kawnga chak zawka hmalak a nih theih nan thawhhona thuthlung an siam a. Chumi hnuaia hmachhawp hrang hrangte zingah ‘Faina Hnatlangpui’ hi a hmahruaina a ni.

Thawhdunna kal zelah YMA Branch Fai Inelna neih turah hian branch hrang hrangte kum khat chhung an inel dawn a ni.

UD&PA Minister K Sapdanga thusawi dangte:

1. Aizawl Smart City Ltd. kaltlangin a bika siam danglam, bawlhhlawh tawih thei phur lirthei 20 lei. Heng lirtheite hi Aizawl Venglai leh Ramhlun South-ah te July leh August, 2024 khan hlawhtling taka enchhin a ni tawh.
2. Bawlhhlawh tawihtheilo sawngbawlna tur bik, ‘75 Ton per Day Material Recovery Facility (MRF)’ chu Aizawl Smart City Ltd.-in Industrial Growth Centre, Luangmualah a siam mek.
3. Hualngohmunah Construction & Demolition Waste Management Rules 2016-in a phut angin, insak leh thiahna bungraw hlui leh bawlhhlawhte sawngbawlna tur bik sak mek peih fel tep tawh.
4. ‘Comprehensive Plan For Municipal Waste Management in Aizawl’ plan-ah hian Aizawl khawpui faina tura ruahmanna leh hmachhawp hrang hrangte tihlawhtling tur hian UD&PA Secretary kaihhruaina in Monitoring Committee siam a ni.